Трансферлар бозорида доимгидек АПЛ клублари фаоллик кўрсатмоқда. Жамоалар аллақачон таркибларини янги футболчилар билан тўлдиришди, лекин қолган бир ой давомида навбатдаги катта трансферлар ҳам рўй бериши мумкин.
«Арсенал»
Ким керак: чап қанот вингери, марказий яримҳимоячи, ҳужумчи
Умуман олганда, «канонирлар»да сифатли ва кенг таркиб мавжуд – Микел Артета алоҳида ўйинларда ҳам, узун мавсум давомида ҳам фаол ротация қилиш имкониятига эга. Аммо янада кучайтиришга зарурат бўлган бир неча позициялар борки, трансферлар бозоридаги сўнгги миш-мишлар ҳам буни тасдиқлайди.
Сўнгги кунларда «Реал» билан шартномаси тугашига бир йил қолган ва янги шартнома бўйича келиша олмаётган Винисиус ҳақида турли хабарлар чиқмоқда. ESPN ва The Athletic нашрлари лондонликлар раҳбарияти ушбу бразилиялик юлдузни трансфер қилиш ғоясини бир овоздан маъқуллаши ҳақида ёзган. «Арсенал»да чап қанот анчадан буён оқсамоқда – ўтган мавсумда ҳужумларнинг фақат 33 фоизи шу қанотдан амалга оширилган, ўнг қанотдаги кўрсаткич – 43 фоиз. Қолаверса, бу ёзда Леандро Троссар ҳам жамоани тарк этди. Тўғри, «канонирлар» аллақачон бу қанотга 40 миллион еврога «Брюгге» вингери Христос Золисни трансфер қилди, аммо у ҳали Мартинелли билан қанчалик рақобатлаша олиши аниқ эмас.
Шунингдек, марказий ҳужум чизиғи бўйича мавҳум вазият юзага келган. Йокерешнинг трансферини муваффақиятсизлик деб бўлмайди, аммо у барибир ўзини супертўпурар сифатида кўрсата олмади. Ҳаверц эса сўнгги йилларда кўп жароҳат олмоқда. Шундай экан, «Арсенал» Ҳулиан Алварес атрофидаги вазиятни синчковлик билан кузатиб бораётгани бежиз эмас. Миш-мишларга кўра, «канонирлар» аргентиналик ҳужумчи трансфери учун Йокереш ва қўшимча маблағ беришни кўзлаган.
Жамоа яримҳимоясидаги Райс ва Субимендига эса ротация керак, уларнинг иккиси ҳам ўтган мавсумда тўхтовсиз ўйнашига тўғри келди ва мавсум охирига бориб толиқиб қолишди, захирадаги Кристиан Норгарга эса Артета ишонч билдирмади. «Арсенал» бу позиция учун «Нюкасл» сардори Бруно Гимарайш бўйича музокаралар олиб бормоқда, «қарғалар» 80 миллион евролик таклифни рад этишган ва футболчи учун 80 миллион фунт сўрашмоқда.
Агар бу трансферлар амалга ошадиган бўлса, «Арсенал» нафақат АПЛда, балки ЕЧЛда ҳам чемпионлик учун асосий даъвогарга айланади.
«Манчестер Сити»
Мавзуга оид
Ким керак: ўнг қанот вингери, ўнг қанот ҳимоячиси, марказий яримҳимоячи
10 йил ичида илк бор «Сити» мавсумни Пеп Гвардиоласиз бошлайди. Энцо Мареска услуб жиҳатдан ушбу испаниялик мутахассисга жуда ўхшаш: катта эҳтимол билан, у ҳам 4-2-3-1 схемасини қўллайди, аммо бу схемада бир неча позицияни янги футболчилар билан тўлдириш талаб этилади.
Бу биринчи навбатда мудофаанинг ўнг қанотига тааллуқли. Мареска учун бу ўта муҳим зона, у тўпга эгалик қилинаётганида қанотдан марказга кўчиб ҳаракатланиши мумкин бўлган «алдамчи фулбек»дан фойдаланишни ёқтиради. Матеус Нунес ва Рико Люис бу рол билан яхши таниш, аммо уларнинг иккиси ҳам бу позиция учун Европанинг энг яхшилари бўлишга даъвогарлик қила олмайди. Бошқа томондан, ҳозирча бу зона учун кимдир олиб келиниши ҳақида хабарлар чиқмади.
Иккинчи эҳтимолий муаммо – ҳужум қанотида вариантлар етарлича эмаслиги билан боғлиқ. Ўтган мавсум охирида Антуан Семенё бироз толиқиб қолди ва бу ўнг қанот самарадорлигига тўғридан тўғри таъсир кўрсатди. Савио аллақачон ушбу жамоа даражасида эмаслиги билиниб қолган, Фоден ва Шерки эса соф вингер эмас ва марказроқда ўйнашади. Daily Mail нашри ёзишича, Мареска «Челси»да ўзи билан ишлаган Педру Нетуни олиб келишни истамоқда. Шунингдек, Ян Диоманде варианти кўриб чиқилганди, аммо ивуарлик ушбу футболчи «Реал»ни танлади.
Шунингдек, жамоага яна бир яримҳимоячи керак бўлиб қолиши мумкин. «Сити» бу ёзда 135 миллион еврога Эллиот Андерсонни трансфер қилганди, аммо Родри чиндан ҳам «Реал»га кетадиган бўлса, унинг ўрнига футболчи олиш керак бўлади. Бу ҳолда Мареска яна собиқ жамоаси «Челси»га юзланиши мумкин – Энцо Фернандеш у ердан кетиши мумкинлиги ҳақида хабарлар чиқиб турибди.
«Манчестер Юнайтед»
Ким керак: чап қанот вингери, марказий яримҳимоячи
«МЮ» сўнгги 10 йил мобайнида жуда кўп янги футболчи сотиб олди, аммо уларнинг деярли ярми муваффақиятсиз трансферлар бўлиб чиқди. Муаммо фақат футболчиларда эмас, бош мураббийлар ва тактик йўналишлар кўп ўзгарганидадир. Ўтган мавсумда ҳам шу ҳолат кузатилди: Рубен Аморим мавсум ярмида ўрнини Майкл Кэррикка бўшатиб берди ва «Олд Траффорд» учун одатий бўлган 4-2-3-1 схемасига қайтилди.
Шу билан бирга, «Юнайтед»да ҳамон таркиб билан боғлиқ муаммолар сақланиб қолмоқда. Каземиро ўтган мавсумни кучли ўтказди, аммо бу ёзда клуб билан хайрлашди ва энди МЛС чемпионатида Мессига жамоадош бўлади. Угарте эса жамоага келганидан буён асосий таркибга кира олмади ва бу ёзда сотилиши кутилаётганди, аммо ЖЧда оғир жароҳат олиб, режалар бузилиб кетди. «МЮ» аллақачон яримҳимоя учун «Астон Вилла»дан Юри Тилеманс ва «Челси»дан Андрей Сантосни сотиб олди.
Аммо таркиб янада ишончли кўринишга келиши учун яна бир марказий ҳимоячи етишмаяпти. Sky Sports маълумотига кўра, манкунианликлар «Рома»даги Ману Коне ва «Брайтон»даги Карлос Балеба номзодларини кўриб чиқмоқда. Бундан ташқари, ВВС нашри ёзишича, «МЮ» Орелен Тчуаменига ҳам қизиқмоқда. Агар Родри «Сити»дан «Реал»га ўтадиган бўлса, мадридликлар айнан Тчуаменини сотувга қўйиши мумкин.
Шу билан бирга, ҳужумнинг чап қанотида ҳам муаммо мавжуд. Жамоа қанот ҳужумчиларининг барчаси ўнг қанотда ихтисослашган: Амад Диалло, Брайан Мбуемо ва Матеус Кунья. Чапда эса асли ҳимоячи бўлган Патрик Доргу ўйнатилди ва унга ўринбосар йўқ. Ҳозирча бу зона учун ким олиб келиниши ҳақида хабарлар йўқ, аммо «МЮ»да бу ёзда клубини ўзгартиришни истаётган Рафаэл Леау варианти бор.
«Ливерпул»
Ким керак: марказий ҳимоячиси, ўнг қанот вингери
Ўтган ёзда катта трансфер кампаниясини олиб борган «Ливерпул» бу ёзда унчалик фаол эмас. Аммо клубда ўтган мавсум якунида бош мураббий Арне Слотни истеъфога чиқарди, унинг ўрнига келган Андони Ираола эса матбуот учун интервюларида таркибни кучайтириш зарурлигини айтган.
Ушбу мутахассис Муҳаммад Салоҳ кетганидан кейин бўш қолган ўнг қанотни алоҳида кўрсатмоқда. Ҳужумнинг бу қанотида ўйнай оладиганлардан фақат Нгумоа ва Киеза бор, аммо улар бошланғич таркиб футболчилари эмас. Назарий жиҳатдан, жамоанинг янги футболчиси Виктор Муниосни ҳам шу позицияда ўйнатиш мумкин, аммо у аслида чап қанотга ихтисослашган. Шунинг учун «Ливерпул» Брэдли Барколя трансфери учун жиддий ҳаракат қилмоқда. Ушбу ёш француз вингери «ПСЖ»даги ҳолатидан мамнун эмас ва доимий ўйин амалиётига эга бўлишни истамоқда, «Ливерпул» эса ўзининг янги лойиҳасида унга марказий роллардан бирини тақдим этиши мумкин. Лекин муаммо шундаки, Барколя ҳам Муниос каби фаолиятининг катта қисмини чап қанотда ўтказган ва айнан шу нуқтада ўзини яхшироқ ҳис қилади. Sky Sports маълумотига кўра, мерсисайдликлар «Монако» вингери Магнес Аклиушга ҳам қизиқиш билдирган, монегаскликлар яқинда ушбу футболчиси учун «ПСЖ» томонидан берилган 40 миллион евролик таклифни рад этганди.
Ибраима Конате кетганидан кейин мудофаа марказида ҳам бўшлиқ юзага келган. «Ливерпул» «Ренн»дан 21 ёшли француз Жереми Жакени сотиб олган, аммо у асосий таркиб футболчиси бўлиш учун қанчалик тайёрлиги аниқ эмас. Хочсимон боғламлари узилиши туфайли ўтган мавсумни ўтказиб юборган Жованни Леони ҳақида ҳам худди шу гапни айтиш мумкин. Ҳозирда таркибда 35 ёшли ван Дейк билан марказий ҳимоя жуфтлигини ҳосил қилиш учун бор бўлган ягона тажрибали футболчи Жо Гомес қолмоқда – бу эса чемпионлик учун курашувчи жамоа учун яхши танлов эмас.
«Челси»
Ким керак: дарвозабон, марказий ҳимоячи, марказий яримҳимоячи, чап қанот ҳимоячиси
«Челси» ҳам трансферлар борасида «МЮ» каби парадоксли клуб: ҳар ойнада кўп трансфер қилинади, аммо жамоа доим бошланғич таркибни кучайтириш зарурати билан яшайди. Бу сафарги трансферлар ойнаси ҳам истисно эмас – бир неча трансфердан кейин ҳам ҳали бир неча позицияга янги футболчилар керак.
Бу бир жиҳатдан Ҳаби Алонсо келгани билан боғлиқ. «Байер»да ишлаганида унинг севимли схемаси 3-4-2-1 бўлганди, унда «Реал»да бу схемадан фойдаланиш имкони бўлмади, Лондонда эса унга кўпроқ ваколатлар тақдим этилган. Аммо гап шундаки, «Челси» бунгача бутунлай бошқача футбол ўйнаб келган, шунинг учун, мослашиш талаб этилади.
Уч марказий ҳимоячидан иборат схемага ўтиш – автоматик равишда дарҳол бошланғич таркибда туша оладиган янги ҳимоячилар сотиб олиш зарурлигини англатади. Қолаверса, бу ёзда клубни Аксел Дисаси ва Трево Чалоба каби ҳимоячилар тарк этмоқда. «Челси» ҳозирча «Кристал Пэлас»дан Максенс Лакруа трансферини деярли ҳал қилди. Уни юлдуз футболчи деб бўлмайди, аммо ушбу француз футболчиси аллақачон гранд жамоалар даражасида етилган.
Шунингдек, Алонсо Рис Жеймсдан қандай фойдаланмоқчи экани аниқ эмас – ўнг қанотга Палестра сотиб олинди, бу позицияда Мало Гюсто ҳам бор, шундай экан, тахмин қилиш мумкинки, жамоа сардори энди таянч зонасида Кайседога рақобат қилади. Аммо «Челси» тенг кучли икки таркибга эга бўлмоқчи, шунинг учун, «Борнмут» билан 22 ёшли Алекс Скотт трансфери борасида фаол музокаралар ўтказилмоқда, шунингдек, «Страсбур»дан аргентиналик яримҳимоячи Валентин Барко олиб келиниши мумкин.
Чап қанот латерали позицияси ҳам жиддий масала. Гарначо «Астон Вилла»га кетди, энди бу қанотда фақат Ҳато ва Гиттенс қолмоқда, уларнинг иккиси ҳам бу ролни мунтазам бажаришга кўникишмаган. ЖЧда ўзини кўрсатган 18 ёшли босниялик Алайбеговичга қизиқиш борлиги ҳақида хабарлар тарқалган, аммо ушбу футболчи бу даражадаги футболга қанчалик тайёрлиги – катта савол остида.
Шунингдек, дарвоза чизиғи ҳам муаммоли бўлиб қолмоқда. Роберт Санчес «Челси»га келиб қўшилган 2023 йил августидан буён голга ва зарбага олиб келган хатолар бўйича АПЛда иккинчи ўринда. Шу билан бирга, ушбу испаниялик дарвозабон бу борада энг ёмон кўрсаткичлар қайд этган 10 футболчи орасида энг кўп ўйин ўтказган футболчидир. Иккинчи дарвозабон Майк Пендерс ҳали жуда ёш ва уни бошланғич таркибда туширишга ҳали эрта, шундай экан, «Челси» ишончли ҳимояни таъминлаш учун юқори савияли дарвозабон топиши керак бўлади.
