Ўзбекистон Бош прокуратураси матбуот хизмати собиқ раҳбари Сурайё Раҳмонова Ахборот ва оммавий коммуникациялар агентлигининг Давлат бошқаруви органлари ахборот хизматлари фаолиятини ташкил этиш ва мувофиқлаштириш бўлими бошлиғи этиб тайинланган. Бу ҳақда Kun.uz’га агентлик матбуот котиби Ҳикматилла Убайдуллаев маълум қилди.
Эслатиб ўтамиз, кеча, 3 июль куни Сурайё Раҳмонова Ўзбекистон Бош прокуратураси матбуот хизмати раҳбари лавозимини тарк этгани хабар қилинганди.
Сурайё Раҳмонова собиқ бош прокурор Отабек Муродов даврида Бош прокуратура матбуот хизмати раҳбари сифатида прокуратура органларининг шаффофлиги ва очиқлигига, оммавий ахборот воситалари билан яқиндан мулоқотига сезиларли ҳисса қўшди. У матбуот хизмати раҳбари сифатида прокуратура фаолияти билан боғлиқ ҳар бир воқеага тезкорлик билан муносабат билдира олиши билан бошқа айрим давлат идоралари матбуот хизматлари вакилларидан ажралиб турди.
