“Мерседес” жамоаси пойгачиси Льюис Хэмилтон “Формула-1” автопойгасининг 10-босқичи – Британия Гран-приси ғолиби бўлди.
Марра чизиғини иккинчи бўлиб Ҳэмилтоннинг жамоадоши Валттери Боттас кесиб ўтди. 3-ўринни “Феррари” аъзоси Шарль Леклер эгаллади. “Феррари”нинг яна бир аъзоси Себастьян Феттель “Ред Булл” аъзоси Макс Ферстаппен билан тўқнашув учун 10 сониялик жарима билан жазоланган ва пойга натижасига кўра 16-ўрин, Ферстаппен эса 5-ўрин эгаллаган.
Умумий ҳисобда 223 очко билан Ҳэмилтон пешқадамлик қилмоқда. 2-ўринни Боттас (184 очко), 3-ўринни Ферстаппен (136) эгалламоқда.
Эътиборлиси, Ҳэмилтон Британия босқичини фаолиятида 6 марта ютди ва бу натижа рекорд кўрсаткич бўлди. Аввалроқ ушбу босқичда 5 мартадан шотландиялик Жим Кларк ва француз Ален Прост ғалаба қозонган.
Пойганинг кейинги босқичи 26-28 июль кунлари Германияда бўлиб ўтади.
