Apple учта янги iPhone ва Apple Watch соатининг бешинчи моделини тақдим этади

Apple компанияси 10 сентябрь куни iPhone смартфонлари ва бошқа қурилмаларининг янги моделлари тақдимотини ўтказади.

Apple маҳсулотлари бўйича экспертлар янги смартфонлар ўтган йилги iPhone XR, iPhone XS ва iPhone XS Max моделларидан унчалик ҳам фарқ қилмаслигини тахмин қилишмоқда.

Янги смартфонлар экрани 5,8 дюйм, 6,1 дюйм ва 6,5 дюйм бўлиши кутилмоқда. Маълумотларга кўра, биринчи модель iPhone 11 деб, қимматроқ моделлар эса Pro ва Pro Max деб номланади.

Таҳлилчиларнинг фикрича, смартфонлар A13 процессори билан жиҳозланади. iPhone 11 4 Гб ва Pro ҳамда Pro Max 6 Гб тезкор хотирага эга бўлади. Улар намлик ва чангдан юқори даражадаги ҳимояланган бўлади.

Янги смартфонлар 27 сентябрдан сотувга чиқиши кутилмоқда.  

Смартфонлардан ташқари, компания ўзининг Apple Watch 5 ақлли соатларини тақдим этади. Экспертлар шунингдек, экрани 16 дюймли MacBook Pro ҳам намойиш этилишини кутишмоқда.