Мадримов шу ҳафтада Нью-Йоркдаги бокс оқшомининг асосий рингида жанг қилади

Профессионал бокснинг супер ярим ўрта (-69,85 кг) вазн тоифаси вакили Исроил Мадримов 5 октябрь куни ўзининг навбатдаги жангини мексикалик тажрибали боксчи Алехандро Баррерага (29-5, 18 КО) қарши ўтказади.

У ўз фаолиятидаги тўртинчи жангидаёқ АҚШнинг энг машҳур Madison Square Garden асосий аренасида катта бокс оқшомининг асосий икки жангидан бирида рингга кўтарилади. Кечанинг марказий жангида қозоғистонлик бокс юлдузи Геннадий Головкин (39-1-1, 35 КО) украиналик Сергей Деревянченкога (13-1, 10 КО) ўрта (72,58 кг) вазнда вакант бўлган IBF чемпионлик камари учун жанг қилади. 

Эътиборли жиҳати, Исроил Мадримов ҳеч бир боксчи эришмаган тарихий натижани қайд этмоқда. Шу пайтга қадар ҳали бирор бир боксчи 3та жангидан сўнг бундай нуфузли жанг оқшомининг асосий жангида иштирок этмаган.

Геннадий Головкин ва Исроил Мадримов иштирокидаги жанг бокс ошқомининг асосий икки жанги бўлади ҳамда АҚШда DAZN, Буюк Британияда Sky Sports телеканаллари орқали асосий кард сифатида намойиш этилади.

Маълумот учун, 33 ёшли Баррера 34 марта рингга чиқиб уларнинг иккитаси турли даражадаги минтақавий чемпионлик камарларини қўлга киритган. 4 йил муқаддам жаҳон чемпионлиги учун даъвогар номини берувчи жангда ярим ўрта (-66,68 кг) вазн тоифасининг бугунги кундаги етакчи боксчиси, чемпион Эррол Спенсга (25-0, 21 кО) қарши рингга чиқиб, имкониятни бой бериб қўйган.

Эслатиб ўтамиз, Исроил Мадримов профессионал боксда сўнгги марта 8 июнь куни айнан Головкин билан битта бокс оқшомида иштирок этиб, мексикалик Норберто Гонсалесга (24-13, 13 КО) қарши рингга чиққан ва рақибини техник нокаут эвазига мағлуб этганди.