Stratolaunch компаниясига тегишли Roc’нинг қанотлари қулочи 117 метрни ташкил этади. Бу ҳозиргача қурилган барча самолётлар орасидаги энг катта кўрсаткичдир. Аппарат N351SL рақами билан рўйхатдан ўтказилган.
AirNav Radar хизмати маълумотларига кўра, самолёт 2 октябр куни иккита қисқа парвозни бажарган. Ҳар иккиси Мохаве аэрокосмик порти яқинида ўтган. Иккинчи парвозда Roc аэропорт атрофида бир нечта айлана қилган.
Roc оддий юк ташувчи самолёт сифатида эмас, йирик экспериментал аппаратларни белгиланган баландликка олиб чиқиб, ҳаводан учириш платформаси сифатида ишлаб чиқилган. У бошқа фойдали юкларни ташиш учун ҳам мўлжалланган.
Stratolaunch ҳаводан учириш флотини кенгайтирмоқда
Компания бу вазифалар учун фақат Roc’дан фойдаланиш билан чекланмаяпти. У аввал Virgin Orbit’га тегишли бўлган Boeing 747-400 самолётини ҳам харид қилган.
«Мохаве руҳи» — Spirit of Mojave деб номланган ушбу самолёт Talon тажриба аппаратларини ташиш учун қайта жиҳозланган. Boeing 747 Roc’га нисбатан кўпроқ аэропортларда ишлай олади. Бу гипертовушли аппаратлар синовларини турли жойларда ташкил этиш имкониятини кенгайтиради.
Сентябр ойида Stratolaunch яна бир йирик самолёт — Boeing 777-200ER харид қилинганини эълон қилган. Уни ҳам экспериментал аппаратларни ҳаводан учириш платформасига айлантириш режалаштирилган.
Boeing 777ʼдан фойдаланишни 2027 йилда бошлаш кутилмоқда. Компания баҳосига кўра, бу самолётнинг қўшилиши парвоз синовларини ўтказиш имкониятларини тахминан 35 фоизга оширади. Stratolaunch буни гипертовушли технологияларни синашга талаб ортиб бораётгани билан изоҳламоқда.
