Электрон почтага юборилган видеода Тошкентдаги 312-сайлов участкасида бир шахс томонидан бир неча бюлеттен ташланаётгани, бундан ташқари, сайлов участкаси раиси ўзини кузатувчи деб айтаётган аёлнинг сайлов жараёнини кузатишига монелик қилаётгани акс этган.

Видеотасвирларда чиндан ҳам бир йигит 3тадан кўпроқ бюлеттен ташлагани кўринган. Суриштирув давомида ҳодисанинг иштирокчилари топилди. Видеода кўринган кекса онахон – Озода Абдужабборова сайлов бюллетенларини ўзи тўлдирганини, бироқ кўзи яхши кўрмагани учун бюллетенларни сайлов қутисига ташлашда қўшнисидан ёрдам сўрагани маълум бўлди.

«Сайловга чиқдим, бюллетенларни ўзим тўлдирдим. Овоз бериш хонасидан чиққанимда қўшнимнинг ўғлини кўриб қолдим ва кўзим яхши кўрмагани учун ундан бюллетенларни сайлов қутисига ташлаб беришни илтимос қилдим. Сайлов қутисини тирқишини кўра олмадим, қанд касалим, қон босимим бор. Кўзим яхши кўрмагани учун иккита кўзойнак тақаман. Сайлов куни менга 3та [туман ва шаҳар кенгашлари ҳамда Олий Мажлис Қонунчилик палатаси депутатлиги учун биттадан] бюллетен беришди, фақат ўшаларни тўлдирдим», деди Озода Абдужабборова.

Мазкур сайлов округи раиси бир партиядан икки вакил келгани учун улардан бирини сайлов участкасига киритмаганини, қолаверса, иккинчи кузатувчининг Марказий сайлов комиссияси томонидан берилган махсус ҳужжати (бейжик) бўлмагани, шунинг учун уни сайлов жараёнига яқинлаштирмаганини айтди.

314-сайлов участкасидан олинган бошқа бир видеода эса икки аёлнинг бир нечта бюллетенларни сайлов қутисига ташлашга уринаётгани, бюллетенлар кўплигидан сайлов қутиси тирқишига тиқилиб қолгани акс этган.

«Округимдаги 314-сайлов участкасида юз берган бўлган ҳолатни эътибордан четда қолдирибмиз. Бунга ҳуқуқий баҳо берилишига эътирозимиз йўқ. Сайлов жараёнида бунақа ҳолат фақат бир марта кузатилган, камчиликка йўл қўйганимизни тан оламиз ва бунинг учун узр сўраймиз», дейди 14-Пахта сайлов округи раиси Дилдора Якубова.

Видеода қисман кўринган эркак киши аёлларнинг ноқонуний ҳаракатига ҳеч қандай монелик қилмаган ва кузатувчининг ҳолатни видеога олишига эътироз билдирган. Энг қизиғи, видео олинишига қаршилик қилган эркак айни шу участка сайлов комиссиясининг раиси бўлиб чиқди.