20 сентябр куни Германия пойтахти Берлин ҳамда Мекленбург – Олд Померания ерида федерал сайловлар бўлиб ўтди. Канцлер Фридрих Мерц раҳбарлигидаги Христиан-демократик иттифоқ (ХДИ) учун иккала сайлов ҳам мағлубият билан якунланди: Берлинда Депутатлар палатаси учун овоз беришда «Сўл партия» (Die Linke) ғалабани қўлга киритди, Мекленбургда эса регион парламенти (ландтаг) учун сайловда ўта ўнг ҳисобланган «Германия учун муқобил» (AfD) партияси биринчи ўринни эгаллади. Иккала партия ҳам олдинги сайловларда кўрсатган натижасини икки бараварга яхшилаган.
Дастлабки маълумотларга кўра, «Сўл партия» Берлинда жами овозларнинг 25,7 фоизини ўзиники қилган – бу 2023 йилда бўлиб ўтган олдинги сайловлар билан солиштирганда 13,5 фоиз пунктга яхшироқ. Олдинги сайловлар ғолиби бўлган ХДИ эса бу сафар 18,8 фоиз овоз билан кифояланган (9,4 фоиз пункт пасайиш), кейинги ўринларда AfD (16,3 фоиз), «Яшиллар» (14,3 фоиз) ва Германия социал-демократик партияси (12,1 фоиз) жойлашган. Қолган партиялар, жумладан, «Сара Вагенкнехт иттифоқи» (BSW) партияси ҳам 5 фоизлик чегарадан ўта олмаган. Сайловда давомат 74 фоиздан ошган.
«Сўллар» учун бу Берлиндаги сайловлар тарихидаги энг юқори натижа. Сўнгги йиллардаги ребрендинг ва таркиб жиддий ўзгартирилиши партиянинг муваффақиятини таъминлади. Партиядаги раҳбарлик лавозимларини ёш сиёсатчилар, жумладан, аёллар эгаллади ва уларнинг кўпчилиги «Германия учун муқобил» партиясига муросасиз позицияни эгаллайди.
«Сўллар» ўз сайловолди кун тартибини берлинликлар учун энг долзарб ва оғриқли бўлган уй-жой мавзуси атрофида қуришган. Партия сайловларга аллақачон шаҳарга тегишли бўлган хонадонларда ижара ҳақини чеклаш ва йирик хусусий ижарага берувчиларнинг 220 мингга яқин квартираларини жамоат мулкига ўтказишга эришиш ваъдаси билан киришди. Партиядаги ички ислоҳотлар ҳамда танланган кун тартиби бир йил ичида тарафдорлар сонини икки бараварга оширишга ёрдам берди: 2025 йил охирига келиб партияга аъзолар сони 123 минг кишини ташкил этаётганди.
Ғалабадан кейин Берлин шаҳри мэрлигини «Сўллар» етакчиси – 45 ёшли Элиф Эралп эгаллаши керак, Financial Times нашри уни «Берлиннинг Мамданийга жавоби» деб таърифлаган. Эралп – 1980 йилги давлат тўнтаришидан кейин Туркияни тарк этган муҳожирлар фарзанди ҳисобланади. У Берлиннинг муҳожирлардан чиққан илк мэрига айланиши мумкин.
Мекленбург – Олд Померанияда эса «Германия учун муқобил» партияси 38,2 фоиз овоз олган – бу 2021 йилги сайловларга қараганда икки баравар яхшироқ натижа. Бунгача ушбу ҳудудда раҳбарлик қилган социал-демократлар эса 35,5 фоиз билан иккинчи бўлган. Шунингдек, «Сўллар» 6,5 фоиз, «Яшиллар» 5,7 фоиз овоз билан ландтагга кирган.
