Фоиз Сарож Ливияга халқаро кучларни юборишга чақирди

Фото: AP

Ливия миллий армияси қўмондони Халифа Ҳафтар ўз ҳужумини тўхтатмаса, халқаро ҳамжамият Ливиянинг тинч аҳолисини ҳимоялаш бўйича ҳаракатлар амалга ошириши лозим. Бу ҳақда Ливия Миллий келишув ҳукумати раҳбари Фоиз Сарож Welt немис нашрига берган интервьюсида айтиб ўтди.

Сарож, шунингдек, Европа Иттифоқининг Ливия ихтилофини тартибга солишдаги “камтарона” ҳаракатларини танқид қилган.

“Биз ҳимоя кучларини ўз ҳукуматимизни эмас, балки 9 ой давомида тинимсиз бомбардимонга учраган Ливия аҳолисини ҳимоя қилиш учун қаршилаган бўлардик”, деб айтган сиёсатчи.

Унинг таъкидлашича, халқаро кучлар БМТ раҳнамолигида ҳаракат қилиши лозим. Бу кучлар Европа Иттифоқи, Африка иттифоқи ёки Араб давлатлари лигаси кучлари бўлиши мумкин.

19 январда Берлинда Ливиядаги вазиятни тартибга солиш бўйича халқаро анжуман бўлиб ўтади. Унда Ливиядаги ихтилофнинг барча томонлари иштирок этиши кутилмоқда.

Тайёрлаган Шуҳрат Раҳимов

#Ливия #Фоиз Сарож

2011 йилдан буён фуқаролик уруши ҳолатида бўлган Ливияда вазият янада чигаллашмоқда. Туркия Ливия билан ҳарбий соҳадаги ҳамкорлик асосида Африка шимолига ўз ҳарбийларини йўлламоқда.