Бруну Фернандеш «МЮ» билан шартнома имзолади

«Спортинг» яримҳимоячиси Бруну Фернандеш расман «Манчестер Юнайтед» ўйинчисига айланди. Бу ҳақда инглиз клуби расмий сайти маълум қилди.

Манкунианликлар 25 ёшли футболчи билан 5,5 йиллик шартнома имзоланганини эълон қилишди. Шунингдек, битимни яна бир йилга узайтириш имконияти ҳам бор.

Аввалроқ яримҳимоячи Манчестер клубида йилига 6 млн евро маош олиши ҳақида айтилганди. «МЮ» Фернандеш учун 55 млн евро тўлади. Бу қиймат бонуслар ҳисобига 80 млнга ҳам етиши мумкин.

Бруну Фернандеш янги клубидаги илк фикрлари билан ўртоқлашди.

«Манчестер Юнайтед»га бўлган муҳаббатим Криштиану Роналдунинг ўйинларини томоша қилганимда бошланган. Ўшандан бери ушбу катта клубнинг мухлисиман.

«Манчестер Юнайтед»да эканлигимга ишона олмаётгандекман. Мен бунга эришиш учун кўп ишладим. Бу жамоа мухлислари, либоси, логотипи учун боримни бераман ва жамоага ижобий натижалар ҳамда кубокларни олиб келишга ёрдам бераман. «Спортинг»га барчаси учун миннатдорчилик билдираман.

«МЮ»нинг собиқ футболчилари мен ҳақимда айтган яхши гапларни эшитиш кутилмаган бўлди. Олега ва жамоадаги барча инсонларга ишончлари учун катта раҳмат», – деб Фернандешнинг сўзларини келтиради клуб расмий сайти.

Маълумот учун, Криштиану Роналду 2003-2009 йилларда «МЮ»да ўйнаган.