«Манчестер Юнайтед» ЕЧЛ гуруҳ босқичи 3-турида «Комо» майдонида йирик ҳисобда мағлубиятга учради (1:4). Ўйиндан кейин эса клуб лагерида можаро юзага келди: жамоа сардори Бруну Фернандеш очиқчасига бош мураббий Майкл Кэррикнинг тактик режасини танқид остига олди ва тўпсиз ўйнашда бошқача ёндашувни таклиф қилди.
Ўзаро айблов
«Юнайтед» сафар ўйинида илк дақиқалардан муаммога дуч келди: «Комо» яримҳимоячиси Нико Пас иккинчи дақиқадаёқ ҳисобни очди. Италянлар танаффусдан кейин ҳисобни йирик кўринишга келтиришди: Анастасиос Дувикас, Пас ва Хакобо Рамон навбати билан гол уришди. Меҳмонлар 91-дақиқада Жошуа Зиркзенинг ягона голи билан жавоб қайтаришди.
Ўйин якунланганидан кейин инглизлар жамоаси лагерида вазият кескин тус олди. «МЮ» сардори бош мураббий томонидан ушбу ўйин учун танланган тактика тўғри бўлганига ошкора шубҳа билдирди. Ўйиннинг 67-дақиқасида захирага олинган португалиялик яримҳимоячи персонал прессингдан воз кечиб, рақибга тўп билан эркин ҳаракат қилиш имкони берилганига эътироз билдирган.
«Бу биз ўйинни ёмон бошлаб, тезкор гол ўтказиб юборган илк ўйинимиз эмас. Рақиб тўпга эгалик қилаётганида деярли босим уюштирмаяпмиз, тўпга эгалик қилганимизда ҳам сифатли ўйнамаяпмиз, деярли ҳеч нарса ўхшамаяпти. Тезкор гол ўтказиб юборганингда аллақачон ютқазиб қўйгандек ҳиссиёт пайдо бўлади. Бундай ҳолатдан чиқиб кетиш қийин, дадил ҳаракат қилиш, тўпни назорат қилиш ва вазиятлар яратиш қийинлашади. Агар биз буни уддалай олмасак, вазиятни ўзгартириш жуда қийин бўлади», – дея тушунтирган Бруну.
Шундан кейин у мураббийлар штаби қарорлари юзасидан фикр билдирган.
«Персонал прессинг уюштирмаслик, рақибга бўшлиқ қолдириш ва тўпни олиб қўйиш учун имкон кутиш – мураббийларнинг қарори эди. Аммо бундай жамоаларга ҳаддан ташқари эркинлик берилганда, улар ўзларига катта ишонч ҳис қила бошлайди. Буга мен эмас, бош мураббий ва унинг штаби баҳо бериши керак. Баъзида дадилроқ ҳаракат қилиш, таваккалчиликка қўл уриш, олдинроқда босим ўтказиш ва рақибга ноқулайлик туғдириш керак. Уларнинг марказий ҳимоячиси мени майдоннинг иккинчи ярмидаёқ қарши олди. Биз ҳам шундай қилишимиз керак эди, лекин уддалай олмадик», – дея унинг сўзларини келтиради TNT Sports.
Журналист тўғридан тўғри Кэррик танлаган тактика хатомиди, дея сўраганида футболчи жавобдан қочган, аммо танқидини давом эттирган: «Бу савол менга эмас, мураббий ва унинг штабига. Баъзида дадилроқ бўлиш керак, сизни прессинг қилишганида таваккалчиликка бориш ва босим уюштириб, уларни ўзини ноқулай ҳис қилишга мажбурлаш керак».
Мавзуга оид
Кэррикнинг ўзи ҳам футболчилардан норозилигини яшириб ўтирмаган. Инглиз нашрлари ёзишича, ҳакамнинг ўйин якунлангани ҳақидаги ҳуштаги чалинганидан кейин у футболчилар орасидан ўтиб, «Юнайтед» мухлисларига миннатдорчилик билдириш учун трибуналар қаршисига борган, кейин эса ҳеч ким билан гаплашмасдан майдондан чиқиб кетган. Ўйиндан кейинги матбуот анжуманида Майкл хатоларга йўл қўйганини тан олиб, мағлубият учун бор масъулиятни ўз зиммасига олган.
Ундан жамоа сардорининг сўзларига муносабатини сўрашган. Мураббий футболчи билан тўғридан тўғри баҳсга киришмаган, аммо футболчиларнинг ўзи етарлича интенсив ҳаракатлана олмаганига эътибор қаратган.
«Иккинчи бўлимда персонал прессинг қилишга уриндик, аммо буни етарлича интенсивлик билан амалга оширмадик ва айнан шундан сўнг гол ўтказиб юбордик. Агар сиз югурмасангиз, олдинга ташланмасангиз ва ўз вақтида ортга қайтмасангиз, ғалаба қозона олмайсиз».
Бруну нимани назарда тутган ва у қанчалик ҳақ?
Моҳиятан, Фернандеш Кэррик штабининг ўйин учун қўйилган асосий кўрсатмаси юзасидан баҳслашмоқда. «МЮ» «Комо» футболчиларини бутун майдон бўйлаб таъқиб қилмади ва уларни қуйи блокда тиғиз жойлашган ҳолда кутиб олди. Бу режа майдоннинг катта қисми топширишни, рақиб катта куч билан олдинга чиққанида қарши ҳужумларга чиқишни назарда тутарди. Брунонинг ҳисоблашича, «Комо»дек жамоаларга қарши бу иш бермайди: уларга қанчалик кўп эркинлик берилса, улар шунчалик ўзига ишонч билан ўйнайди. У «Юнайтед» ҳам «Комо» каби дадил ҳаракат қилишини хоҳлаганди.
Биринчи бўлимда «Комо» ўйин вақтининг 60 фоиз қисмида тўпга эгалик қилди, тўпни ишонч билан олиб юрди, «МЮ» эса танаффусга қадар дарвоза соҳасига тўғри борган бирорта зарба бера олмади.
Аммо ўтказилган голларга қаралса, гап мураббийлар штабининг прессинг схемасида эмаслигини кўриш мумкин. Биринчи эпизодда ҳимоячилар Нико Пасга жарима майдони чизиғи яқинида тўпни қабул қилиб, уни оёғига мослаштириб, ўгирилиб, зарба беришига томошабин бўлиб туришди.
Иккинчи ва учинчи голлар эса Карлос Балеба майдон марказида сусткашликка йўл қўйиши оқибатида ўтказилди: аввалига Люк да Куня уни осонлик билан алдаб ўтди, кейин эса Пас ундан тўпни олиб қўйиб, жарима майдонигача кириб борди ва ўзи гол урди. Персонал прессинг бундай хатолардан сақлай олмайди.
Ўз навбатида, Брунунинг эътирозида ҳам жон бор: кучли технарларга эга бўлган жамоага тўпни топшириб, пассив ўйнаш – катта таваккалчилик эди ва «Комо» бундан фойдаланди. Шу билан бирга, юқори чизиқда персонал прессинг уюштириш футболчиларнинг синхрон ҳаракатларини талаб этади, «МЮ» эса бундай жиҳати билан мақтана олмайди.
Қуйидаги скриншотда биринчи линиядагилар босим уюштирганида иккинчи линия олдинга бормагани ва орада катта бўшлиқ ҳосил бўлганини кўриш мумкин.
Ва Брунунинг ўзи ҳам фаришта эмас – у кўп ҳолларда жамоадошлари қўлловини кутмасдан якка ўзи прессингга боради ва ҳеч нарсага эриша олмайди. У зарурат бўлмаганида ҳам дарвозабонни прессинг қилишни ёқтиради ва жамоадан узилиб қолади.
Қолаверса, «Комо» билан ўйин учун таркиб дадил прессинг уюштиришга мос эмасди: майдонда Кобби Майну, Люк Шоу ва Лисандро Мартинес йўқ эди, Маттейс де Лиҳт эса ўтган йил ноябридан буён илк бор стартда тушганди. Бундай шароитда бутун майдон бўйлаб рақибнинг ҳар бир футболчисига биттадан футболчи бириктириш янада хавфли эди. Бу ўйин учун мураббийлар штаби танлаган услуб назарий жиҳатдан тўғри ва тушунарли эди, аммо бу амалда иш бермади.
Энди Кэррикнинг муаммоси биргина тактикада эмас. 1:4 ҳисобидаги мағлубиятдан кейин жамоа сардори барчасини мураббийга тўнкади – бу эса унинг авторитетига жиддий зарбадир.
Ғалабасиз етти ўйин ва истеъфо хавфи
Италиядаги йирик мағлубият «Манчестер Юнайтед» учун муваффақиятсиз мавсум стартидаги навбатдаги эпизод бўлди. Жамоа барча турнирлар доирасида қаторасига етти ўйинда ғалаба қозона олмаяпти: бу оралиқда тўрт ўйинда мағлуб бўлган ва уч бор дуранг ўйнаган. Манкунианликлар бу мавсумдаги 11 ўйинда фақат иккитасида ғалаба қозонди — АПЛда «Ипсвич» билан ўйинда (5:2) ва Чемпионлар лигасида Озарбойжоннинг «Сабаҳ» (4:0) клубига қарши.
Муваффақиятсизликларга антирекордлар ҳамроҳлик қилмоқда. Opta портали маълумотига кўра, «МЮ» Англиянинг Европа майдонларида қатоорасига икки ўйинда дастлабки икки дақиқа ичида гол ўтказиб юборган илк жамоаси бўлди. Ўтган турда Кэррик бошқарувидаги жамоа «Атлетико»га биринчи дақиқадаёқ гол уришга имкон берганди, энди эса «Комо»дан иккинчи дақиқадаёқ гол ўтказиб юборди. Бундан ташқари, жамоа ЕЧЛда 2019 йилдан буён илк бор учта тўп фарқи билан ютқазди – ўшанда «қизил иблислар» «Барселона»га мағлуб бўлганди (0:3).
Муаммо фақат еврокубоклар билан чекланмайди. «МЮ» Англия чемпионатида етти турда етти очко тўплаган ҳолда турнир жадвалида 13-ўринда бормоқда. Бундан ташқари, клуб сентябр ойида «Брайтон»га қарши ўйинда 2:0 ҳисобида олдинда бора туриб, якунда ютқазди (2:3) ва Англия лигаси кубогини эрта тарк этди. Кўп сонли жароҳатлар эса вазиятни янада оғирлаштирмоқда: «Комо»га қарши ўйинда Кэррик асосий таркибнинг бир неча вакиллари хизматларидан фойдалана олмади.
Муваффақиятсиз натижалар ва жамоа ичкарисидаги токсик муҳит туфайли британ нашрлари бош мураббий истеъфоси яқин экани ҳақида бонг урмоқда. Англиядаги турли нашрларга кўра, унинг ўрнига келиши мумкин бўлган бир неча номзод бор – улар орасида Антонио Конте, мавсум арафасида «Нюкасл» бош мураббийлигини тарк этган Эдди Ҳау ҳамда жаҳон чемпионатидаги муваффақиятсизликдан кейин Германия миллий жамоаси бошқарувини тарк этган Юлиан Нагелсманн кабилар бор.
«Манчестер Юнайтед» кейинги ўйинни 25 октябр куни «Олд Траффорд»да «Борнмут»га қарши ўтказади. Аммо ўша куни жамоани Кэррик бошқариши аниқ эмас.
Февралда Бруну Кэррикни мақтаётганди
2026 йил 7 феврал куни «Манчестер Юнайтед» «Тоттенҳэм»ни мағлуб этиб (2:0), Кэррик қайтганидан кейин қаторасига тўртинчи учрашувда ғалаба қозонганди. Фернандеш ўшанда иккинчи голни урган ва ўйиндан кейин мураббий шаънига мақтов ёғдирганди.
«Майкл тўғри ғоялар олиб келди. У футболчиларга масъулият юклади, аммо майдонда қарор қабул қилиш бўйича эркинлик ҳам берди. У керакли сўзларни топа олади. Ўйлайманки, Майкл ўтган сафар жамоани бошқарганида унга нима деганимни ҳали ҳам эслайди. Ўшанда ҳам у ажойиб мураббий бўлиши мумкинлигига ишончим комил эди. Энди у буни исботлаяпти. Умид қиламанки, биз унга ёрдам беришда давом этамиз, шунда ҳамма нафақат бизнинг яхши футболчилар эканимиз ва «МЮ»да ўйнашга лойиқлигимизни, балки мураббийлар штабимиз қанчалик яхши эканини ҳам кўради», – деганди Бруну.
Фернандеш 2021 йил декабридаги вазиятни эслаганди, ўшанда Оле-Гуннар Сулшер истеъфога чиқарилган ва Кэррик вақтинча «МЮ» бош мураббийига айланганди. Унинг бошқарувидаги учта ўйинда жамоа «Вилярреал» (2:0) ва «Арсенал» (3:2) устидан ғалаба қозонган, шунингдек, «Челси» билан дуранг ўйнаганди (1:1). Айнан ўшанда Бруну Кэррикнинг мураббийликдаги истиқболига ишонишини айтганди. У Майкл клубдаги стандартларни тўғри тушунишини қайд этганди: «У бу ерда ҳамма нарсани ютган. «Манчестер Юнайтед» билан ғолиб бўлиш, бу мухлислар учун ўйнаш ва муваффақият учун қанчалик меҳнат қилиш кераклигини жуда яхши билади».
Унинг февралдаги мақтовли сўзлари бежиз эмасди. Кэррик қайтганидан кейин Фернандешни унинг одатий ўнлик позициясига қайтарганди, Рубен Аморим даврида эса у анча орқароқда ўйнашига тўғри келганди. Янги бош мураббий буни жамоа сардорига ҳужумларда эркинлик бериш истаги билан изоҳлаганди. У футболчининг юқори интеллекти, вазиятлар ярата олиш ва майдонда мустақил ечимлар топиш салоҳиятини эътироф этганди.
