Boeing 58 йил ичида илк бор январда бирорта буюртма олмади

Boeing 1962 йилдан бери илк бор январда бирорта самолётга буюртма расмийлаштирмади. Бу ҳақда Reuters ахборот агентлиги хабар берди.  

Таъкидланишича, бир вақтлар АҚШда энг кўп сотилган 737 Max самолёти билан юз берган иккита авиаҳалокатдан кейин бошланган инқироз сабабли компаниянинг ишлари ортга кетди. 

Таққослаш учун, компания 2019 йил январида мижозларга 46 та самолёт етказиб берган ва 45 та янги буюртма олган.   

Boeing январда буюртмачиларга 13 та самолёт, жумладан 6 та 787 Dreamliner, иккитадан Boeing 767 ва 777 ҳамда 3 та 737NG моделидан етказиб берган. 737 Max модели январдан ишлаб чиқарилиши тўхтатилган.

Ўз навбатида Boeing’нинг асосий рақобатчиси – Европанинг Airbus концерни январда охирги 15 йил ичидаги энг йирик буюртмани олганини эълон қилди. Компания январь давомида 274 та самолётга буюртма олган. 

2019 йилда АҚШ компанияси 22 йил ичида илк бор зарар кўрган. Зарар миқдори 636 млн долларни ташкил қилган.  

Январь охирида Boeing бош директори ўзгариб, компанияга Дэвид Кэлхун раҳбар этиб тайинланди. У 737 Max модели келажагига ишонишини ва компаниянинг жорий бизнес-портфели унга моделнинг эксплуатацияси тиклангунгача молиявий ликвидликни таъминлашини айтган.