Ҳожи Абдулазиз Абдурасулов уй-музейи Самарқанд давлат музей-қўриқхонасининг филиали сифатида ташкил этилади

Вазирлар Маҳкамасининг “Ҳожи Абдулазиз Абдурасулов уй-музейи фаолиятини ташкил этиш тўғрисида”ги қарори лойиҳаси муҳокама учун жойлаштирилди.

Самарқанд вилояти ҳокимлиги, Маданият вазирлигининг Самарқанд шаҳрида Ҳожи Абдулазиз Абдурасулов уй-музейини Самарқанд давлат музей-қўриқхонасининг филиали сифатида ташкил этиш тўғрисидаги таклифлари маъқулланиши мумкин.

Самарқанд вилояти ҳокимлиги Маданият вазирлиги билан биргаликда:

Самарқанд шаҳри, Кўкмасжид маҳалласи, Ҳожи Абдулазиз Абдурасулов кўчаси, 9-уй манзилида жойлашган бинони Самарқанд давлат музей-қўриқхонасига оператив бошқариш ҳуқуқи асосида бепул беришни ҳамда бинонинг кадастр ҳужжатларини расмийлаштиришни;

Ҳожи Абдулазиз Абдурасулов уй-музейини Самарқанд шаҳри, Кўкмасжид маҳалласи, Ҳожи Абдулазиз Абдурасулов кўчаси, 9-уй манзилида жойлашган бинога жойлаштиришни;

ташкил этилаётган музейнинг асосий вазифаларидан келиб чиқиб, музей тўғрисида низомни ишлаб чиқиш ва тасдиқлашни;

музейнинг штатлар жадвали белгиланган тартибда ишлаб чиқилиши ва тасдиқланиши ҳамда унинг малакали кадрлар билан тўлдиришни;

музейда маданий-маърифий тадбирлар, Ҳожи Абдулазиз Абдурасулов бой ижодини ўрганиш, давра суҳбатлари, ижодий учрашувлар ташкил этишни;

музейга замонавий интерфаол ахборот-технологияларни жорий этишни таъминлайди.

Маданият вазирлиги:

манфаатдор вазирликлар ва идоралар билан биргаликда музей экспозициясини музей ашёлари билан тўлдириш чораларини кўради;

Туризмни ривожлантириш давлат қўмитаси, Самарқанд вилоят ҳокимлиги билан биргаликда музейга сайёҳларни кенг жалб этиш чораларини кўради.

Белгилаб қўйилишича:

музейга штат бирликларини ажратиш ҳамда ходимларига иш ҳақи тўлаш Маданият вазирлиги тизимидаги музейлар учун белгиланган тартибга мувофиқ;

музейларни сақлаш харажатлари, унинг ўз даромадлари, маҳаллий бюджети маблағлари ва қонун ҳужжатларида таъқиқланмаган бошқа манбалар ҳисобидан амалга оширилади.