26 март куни Олий Мажлис Қонунчилик палатаси Кенгашининг йиғилишида Ўзбекистоннинг Евроосиё иқтисодий иттифоқи билан ҳамкорлигига оид масала кўриб чиқилди. Қонунчилик палатаси матбуот хизмати Олий Мажлис Қонунчилик палатаси Спикерининг биринчи ўринбосари Акмал Саидов билан суҳбатлашиб, муҳокама этилган масала бўйича саволларга жавоб олган.

«Президентимизнинг Олий Мажлисга Мурожаатномасида бугунги кунда Ўзбекистоннинг Евроосиё иқтисодий иттифоқи билан ҳамкорлик қилиш билан боғлиқ масалалар ўрганилаётгани, бунда, энг аввало, халқимиз манфаатларидан келиб чиқиб, ёндашишимиз зарурлиги таъкидланиб, парламент палаталарида мазкур масалани атрофлича муҳокама қилиш кераклиги қайд этилган эди.

Бу, биз, депутатлар ва сенаторлар зиммасига катта масъулият юклайди. Чунки халқимиз хоҳиш-иродасига таянган ҳолда, асосланган хулосаларни айтишимиз керак.

Қайд этиш жоиз, ЕОИИ таркибига тўлақонли аъзо бўлиб кириш ёки кузатувчи мақомига эга бўлишдан олдин ҳар бир мамлакат ва унинг фуқаролари, энг аввало, ЕОИИга оид ташкилий-ҳуқуқий муносабатларни, тартибга солувчи органлар ва уларнинг фаолиятини, ҳамкорликнинг ҳуқуқий асосларини, шунингдек, ўзаро келишув ва битимлар мамлакат учун нима манфаат бериши ёки қандай салбий оқибатларга олиб келишини чуқур таҳлил қилиши мақсадга мувофиқ.

Шу боис, Кенгаш йиғилишида мамлакатимизнинг Евроосиё иқтисодий иттифоқи билан ҳамкорлигига оид масалани ўрганиш бўйича тегишли қарор қабул қилинди», дейди Акмал Саидов.

Маълум қилинишича, парламент қуйи палатаси Кенгаши қарори билан Ўзбекистон Республикасининг Евроосиё иқтисодий иттифоқи билан ҳамкорлигини йўлга қўйиш масаласини ўрганишни ташкил этиш бўйича ишчи гуруҳи тузилган ва унинг таркибидан барча сиёсий партиялар фракциялари раҳбарлари, қўмиталар раислари, соҳани чуқур биладиган депутатлар ўрин олган.

Ишчи гуруҳ раҳбари этиб тасдиқланган Акмал Саидов мазкур ишчи гуруҳнинг вазифаларини санаб ўтган:

— ЕОИИ билан ҳамкорликнинг миллий иқтисодиётга таъсирини чуқур таҳлил қилиш;
— қисқа, ўрта ва узоқ муддатли истиқболда миллий иқтисодиёт ривожланишининг устувор йўналишларига ЕОИИ билан ҳамкорликнинг мослигини ўрганиш;
— ҳамкорликнинг ҳар бир иқтисодиёт тармоғига ижобий ва салбий таъсирини батафсил ёритиб бериш;