Туркияга келин бўлган ўзбекистонлик аёл куёв томон совға қилган тилла тақинчоқларни тўйдан сўнг ўғирлаб қочиб кетганликда айбланди. Ўзбекистон Истанбулдаги Бош консулхонаси аёл қочиб кетмагани ва у ҳозирда Туркия ҳудудида эканлигини маълум қилди.
Қайд этилишича, ўзбекистонлик 28 ёшли М.Б. Муғла вилояти Милас туманидаги оилалардан бирига келин бўлиб тушган.
Таъкидланишича, у ҳеч қаерга қочиб кетмаган ва ўз ихтиёри билан маҳаллий полиция бўлимига бориб, ҳолат юзасидан кўрсатма берган.
Аёл ўзига нисбатан билдирилган даъволарни рад этиб, тўйда тақилган тилла буюмларни онаси билан биргаликда қайнотасига топширганини билдирган. Унга кўра, қайнотаси кейинчалик ушбу тиллаларни кредит ва бошқа қарзларини тўлаш учун сотганини ўзаро ёзишмаларда қайд этган.
Аёл бу борадаги далилларни Туркия ҳуқуқни муҳофаза қилувчи органларига тақдим этган.
Айни пайтда ҳолат юзасидан суриштирув ҳаракатлари олиб борилмоқда.
