Россиялик миллиардер жонсиз ҳолда топилди

Бу ҳақда РБК нашрига унинг учта таниши ҳамда бизнесменга тегишли компаниялардан бирининг топ-менежери маълум қилган.

Манбалардан бирининг маълум қилишича, миллиардер 6 майга ўтар кечаси ўз жонига қасд қилган.

Москва вилояти ички ишлар бош бошқармасида полиция кечаси Босов яшаган Усово посёлкасига ўз жонига қасд қилиш билан боғлиқ чақирув бўйича чиққанини маълум қилган. Тадбиркор бошидан олинган ўқотар жароҳат оқибатида жон берган. Унинг жасади ёнида Glock 19 gen 4 тўппончаси топилган.

Тадбиркорнинг жасадини унинг рафиқаси ва уйидаги фитнес-зал қўриқчиси аниқлаган. Таъкидланишича, Босов рафиқасининг қўнғироқларига жавоб бермагач, у хавотирланиб уйига қайтган. Аёл қўриқчи билан кузатув камераларидаги ёзувлар бўйича турмуш ўртоғи фитнес-залга кирганини кўрган. Зал эшиги ичкаридан қулфланган бўлган. У уриб очилганда ичкарида бизнесмен жасади аниқланган.

Босовнинг яқин танишларидан бирининг таъкидлашича, у охирги вақтда “асабий ҳолда” бўлган ҳамда оиласида тез-тез можаролар юз бериб турган.

Босов антрацит (энг юқори сифатдаги тошкўмир) қазиб олиш ва уни экспорт қилиш бўйича дунёдаги етакчи ва Россияда металлургик кўмир ишлаб чиқарувчи энг йирик компания “Сибантрацит”ни назорат қилувчи “Аллтек” гуруҳи раҳбари ҳисобланган. У, шунингдек, яна бир нечта компанияларга, жумладан “ВостокУголь”га эгалик қилган. Forbes нашри миллиардернинг бойлигини 1,1 млрд долларга баҳолаган ва россиялик миллиардерлар рўйхатида 86-ўринга қўйган. 

Апрель бошида Босов “ВостокУголь” бўйича бизнес-ҳамкори ва “Сибантрацит” директорлар кенгаши аъзоси Александр Исаевни бўшатиб юборган. Исаевнинг бўшатилиши сабаби сифатида ўз ваколатини суиистеъмол қилиш ва у томонидан ўзига ишониб топширилган ҳудудларда ўғрилик қилиш ҳамда ёлғон маълумотларни тарқатиш кабилар кўрсатилган.