Мурожаатни ўрганиш мақсадида Бўстонлиқ туманига бордик. Бизни қўлларида ўз ерларига тегишли хужжатлар билан кўплаб фуқаролар кутиб олишди. Улар билан бирма-бир суҳбатлашиб, тегишли ҳужжатларини кўздан кечирдик.
Фуқароларнинг айтишича, Янгиовул кўчасида жойлашган 24та уй-жой «снос»га тушган ва 4та хонадонга суд қарор ҳам чиқариб бўлган.
Бу ерларни фуқаролар турли йилларда сотиб олишган. Баъзиларига мерос тариқасида қолдирилган.
Туман прокуратураси ушбу 24та уй-жойга нисбатан ер ажратиш қарори, олди-сотди шартномаси, кадастр ҳужжатларини ҳақиқий эмас деб топиш, қурилмаларни бузиш, ер майдонини асл ҳолига келтириб, давлат захирасига қайтариш тўғрисида судга даъво аризаси киритган.
Сайёр суд 4та уй-жойга нисбатан ерни олдинги ҳолатига қайтариш бўйича қарор қабул қилган. Қолган уй-жойлар бўйича суд ишлари давом этмоқда.
Aжабланарлиси шундаки, фуқароларнинг турли йилларда расмий равишда мулк қилиб олган ерлари ноқонуний деб топилмоқда ва компенсация масаласи ҳал этилмаяпти. Мурожаатчиларга кўра, компенсация ҳақида ҳатто гап-сўз ҳам бўлмаган.
«Яқинда фарзандли бўлдим. Прокуратура, ҳокимият ва суддан одамлар келиб жойимизни олиб қўйишмоқда. Бизнинг кадастр ҳужжатларимиз, олди-сотди шартномаларимиз бор. Компенсация ҳақида гап ҳам бўлгани йўқ. Суд ҳам жойида муаммони чуқур ўрганмасдан қарор чиқармоқда.
Бу ерда бизнинг айбимиз нима? Шунча йил ўтганидан кейин энди бундай ишлар бўлмоқда. Хўп, қарор, имзо, муҳр сохта экан. Лекин биз уни билмаганмиз-ку», дейди уйи «снос»га тушган фуқаролардан бири.
Уйлари «снос»га тушган фуқаролар ҳақида маҳалла раисидан ҳам изоҳ сўрадик. Унинг айтишича, икки йилдан бери фуқаролар шу уйларда яшаб келмоқда.
«Ишга келганимга икки йил бўлди. Лекин ҳозирда ушбу жойлар бузилишга тушган. Компенсация масаласи очиқ қолмоқда», – дейди маҳалла раиси.
