Россияда чиқинди йиғиб юрган Исломбекнинг онасига алимент пуллари ундириб берилди

11 яшар Исломбекнинг Россия чиқиндихоналарида ризқ қидириб юргани кўпчиликка қаттиқ таъсир қилганди. Унинг онасининг қонуний ҳуқуқлари тикланди.

Фуқаролик ишлари бўйича Қарши туманлараро судининг 23.12.2019 йилдаги суд буйруғига асосан қарздор Б. С.дан ундирувчи Жалолова Шаҳнозанинг фойдасига икки нафар вояга етмаган фарзандларининг моддий таъминоти учун алимент ундириш тўғрисидаги ижро ҳужжати Бюронинг Қарши туман бўлимига 28.12.2019 йилда келиб тушган ва шу куннинг ўзида ижро иши қўзғатилган.

Қарздорнинг мол-мулкларини аниқлаш мақсадида тегишли ташкилотларга сўровномалар юборилиб, жавоб хатлари олинганда қарздорнинг ундирув қаратилиши мумкин бўлган мол-мулклари аниқланмаган.

Ижро ҳаракатлари давомида, 13.03.2020 йилда қарздордан 340 минг сўм ундирилган.

Ижро ишидаги ҳужжатларга кўра, қарздор алиментни ўз вақтида тўлаши ҳақида, тўламаган тақдирда тегишли жавобгарликка тортилиши ҳақида огоҳлантирилиб келинган.

Бироқ қарздор алимент пулларини ўз вақтида тўламай келганлиги сабабли давлат ижрочиси томонидан 15.06.2020 йилда алимент қарзини ҳисоблаш тўғрисида қарор чиқарилган ва қарздорлик 29.12.2019 йилдан то 15.06.2020 йилга қадар 5.270.808 сўм ҳисобланган.

Олиб борилган ижро ҳаракатлари натижасида 22.06.2020 йилда қарздор Б. С. дан ундирилмай қолган 4.930.808 сўм алимент пуллари тўлиқ ундирилди.

Жалолова Шаҳноза жорий йилнинг 22 июнь куни Ўзбекистонга учиб келгандан сўнг 14 кунлик карантинга олинган. 06.07.2020 йилга ўз уйига қайтганидан сўнг, 7.07.2020 йилда алимент пуллари ундирувчига топширилди.