Чирчиқда 2019 йили «Обод маҳалла» дастурига тушган маҳалла қачон обод бўлади? Ишлар чала ташлаб кетилган

2018 йил 27 июндаги президент қарори билан «Обод маҳалла» дастури доирасида 2018–2019 йилларда қурилиш, таъмирлаш ва ободонлаштириш ишлари амалга ошириладиган маҳаллалар рўйхати тасдиқланган бўлиб, Тошкент вилоятининг Чирчиқ шаҳридаги Маданият маҳалласи ҳам ушбу дастурга киритилган.

Бироқ маҳалла фаоли Маъмур Чориевнинг Kun.uz’га маълум қилишича, дастур ижроси устидан тизимли назорат ўрнатилмагани, маблағлар ўз вақтида ажратилмагани сабабли дастурда белгиланган ишлар ўлда-жўлда ташлаб қўйилган.

«Маҳалламизга ичимлик суви тортиб келинди. Бунинг учун катта раҳмат. Бироқ ҳалигача кўчамиз асфальт қилинмаган, йўлларимиз қувур тортилганда кавланиб, бетартиб кўмилгани сабабли ўнқир-чўнқир бўлиб ётибди.

Бунинг устига, дастур асосида кўчадаги симёғочларни янгиланиши керак эди, аммо ҳалигача бу иш амалга оширилмади. Масъулларга қайта-қайта мурожаатларимиздан сўнг симёғоч учун 15 та устунни олиб келиб ташлаб кетишди. Аммо уларни ўрнатадиган мард топилмаяпти», дейди у.

Мақсуда Эгамбердиеванинг айтишича, Маданият маҳалласининг юқори қисмида ҳарбийлар учун қурилган кўп қаватли уйларнинг канализация қувурлари ҳам улар яшайдиган кўчадан ўтиши белгиланган. Бироқ бу қурилиш-монтаж ишлари учун ўз вақтида пул ажратилмаётгани боис Ҳақиқат кўчасини асфальтлаш кечикиб кетган. Аҳоли бу кўчадан ёзда тупроқ, қишда лой кечиб юришга мажбур бўлмоқда.

«Маҳалламиз «Обод маҳалла» дастурига тушганда жуда хурсанд бўлгандик. Бироқ қувончимиз узоққа чўзилмади. Ишлар бунчалик бетартиб бўлишини тасаввур ҳам қилмагандик. Ҳали маҳаллага ичимлик суви тортилмай туриб йўлсозлар кўчамизни асфальт қилишга тушишди. Эртага сув тортиладиган бўлса, янги асфальт яна бузилиб кетмасин, икки марта харажат бўлмасин деб Чирчиқ шаҳрининг собиқ ҳокими Рашидовга мурожаат қилиб асфальтлаш жараёнини тўхтаттирдик. Ҳоким ўринбосари Ашуров ёрдамида маҳалламизга ичимлик суви келтирилди.

Шундан сўнг кўчамиздаги симёғочлар янгиланиши, чироқлар ўрнатилиши керак эди, аммо симёғочлар ўз вақтида ажратилмагани боис бу ишлар қолиб кетди. Бундан ташқари, йўлсозлар энди асфальтлашни бошлашаётганда ҳарбийларнинг уйларига тортилган канализация қувурлари бизнинг кўчамиздан ўтиб, марказий канализация тизимига уланадиган бўлиб қолди. Аммо бу иш ҳам чала ташлаб қўйилгани боис кўчамиз таъмирланмаяпти, натижада ёзда чанг ютиб, қишда лой кечиб яшаяпмиз», дейди Мақсуда Эгамбердиева.

«Мактаб ўқитувчисиман. Ҳар куни шу йўлдан ишга бориб, жамоа олдида уяламан, сабаби қишда оёқ кийимим лойга, балчиққа ботиб ишга бораман. Машина йўлнинг охиригача боролмайди. Тупроқ, лой йўлдан юришга мажбурмиз. Ёзда кўчадан кўтарилган чанг уйга кириб қолади, ҳар куни икки-уч марта тозаласангиз ҳам тозаланмагандай бўлиб тураверади», дейди Юлдуз Камолова.

2,6 минг киши яшайдиган Маданият маҳалласига кўп йиллар раислик қилган Инна Шелудконинг айтишича, Ҳақиқат кўчасида яшовчилардан кимдир оғир бемор бўлиб қолса, йўл носозлиги туфайли бу ерга тез ёрдам машинаси келолмайди. Йўқотиладиган ортиқча ҳар бир дақиқа эса бемор учун ҳаёт-мамот масаласи бўлиши мумкин. Пандемия шароитида бу ҳар қачонгидан кўра долзарб аҳамият касб этади. Шунингдек, у йўлнинг носозлиги сабабли бу ерга ахлат йиғувчи машиналар ҳам киролмаётганини қўшимча қилди.

Мурожаатчиларнинг таъкидлашича, туман ҳокимлигининг кўрсатмаси билан маҳалла раиси бошчилигида кўчанинг бир қисми асфальт қилинган. Бироқ канализация қувурлари ётқизилиши муносабати билан у қўпориб ташланган. Қайта асфальтлаш учун пул ажратиладими-йўқми, ҳозирча номаълум.

Чирчиқ шаҳар ҳокими ўринбосари Бобир Давлатов Ҳақиқат кўчасини асфальт қилиш, кўчадаги симёғочларни алмаштириш режада борлигини айтди. Ҳоким ўринбосари бу ишларнинг ижроси кечикаётганини «Обод маҳалла» дастурини молиялаштириш вақтинча тўхтатиб турилгани билан изоҳлади.

«Маҳалламизда амалга оширилиши керак бўлган ишлар аслида 2019 йилга мўлжалланган. Президент қарори билан тасдиқланган иловаларда шундай кўрсатилган. «Обод маҳалла» дастури учун ажратилган пуллар ҳам 2019 йилда берилган, 2020 йилга пул ажратилмаган, билишимизча.

Ўртада пандемия, кучайтирилган карантин чоралари сабабли ишлар кечиктирилди. Энди маблағ йўқ дейишяпти. Хуллас, ҳаммаси ўтар-кетар, ўртада куйиб қолаётган биз бўлиб қоляпмиз. Мурожаат қилмаган жойимиз қолмади. Берилаётган жавоблардан қониқаётганимиз йўқ, бизга жавоб ёзишмасин, муаммомизни ҳал қилиб беришсин», дейди Маъмур Чориев Kun.uz мухбири билан суҳбатда.

Аслида бу мурожаат шу йилнинг 30 июнь куни жойига чиқиб ўрганилган, шаҳар ҳокимининг шу соҳага масъул ўринбосари Бобир Давлатов пул ажратилгунча кўча шағал қилиниши ва қолган масалалар босқичма-босқич ҳал этилишига ваъда берган эди.

Бироқ мурожаат муаллифларига кўра, ушбу ваъда бажарилмаган, муаммолар ҳалигача тўлиқ ҳал этилмаган. Ўша пайтда мазкур масалани ўрганган Бобир Давлатов бугунги кунда бошқа ишга ўтказилган, унинг ўрнига Рустам Тошхўжаев тайинланган. У Маданият маҳалласидаги вазиятдан қанчалик хабардор экани бизга қоронғи.

Kun.uz мазкур ҳолат бўйича Чирчиқ шаҳар ҳокимлиги ва бошқа масъул идоралардан изоҳ кутиб қолади.

Жамшид Ниёзов, Kun.uz мухбири.
Тасвирчи – Дониёр Ёқубов.