Вазир ўринбосари «Мендирман Жалолиддин» сериалининг номланиши ва унда нега турк актёри бош ролда ўйнаганини изоҳлади

«Ўйлашимча, сериални кўрмай туриб актёрнинг иштирокига баҳо бериш хато бўлади», – деган маданият вазирининг биринчи ўринбосари Жамол Носиров.

Маданият вазирининг биринчи ўринбосари Жамол Носиров Ўзбекистон ва Туркия ҳамкорлигида суратга олинаётган «Мендирман Жалолиддин» сериалининг номланиши ва унда нега турк актёри бош ролда ўйнагани юзасидан изоҳ берди.

«Биласиз, кино суратга олинишида кастинг жараёни бўлади. Айнан кастинг натижаларига кўра филмга актёрлар танланади. Худди шундай бу сериал олдидан ҳам кастинг кечган. Ўйлашимча, сериални кўрмай туриб актёрнинг иштирокига баҳо бериш хато бўлади. Филмни кўргандан кейингина фикр билдириш керак.

Шунингдек, гап сериалда бош ролни ким ўйнашида ҳам эмас, балки қандай ўйнашида. Биз бутун дунёга миллий қаҳрамонимиз Жалолиддин Мангубердининг қандай мард қаҳрамонлигини тўғри кўрсатиб беришимиз керак. Худо хоҳласа, филм намойишидан кейин бу мавзуга яна қайтсак бўлади», – деган у 15 декабр куни ўтказилган матбуот анжуманида.

Kun.uz мухбирининг хабар беришича, Жамол Носиров ушбу сериалнинг номланиши юзасидан берилган саволга ҳам қисқа изоҳ берган.

«Сценарийда айнан шундай ёзилган, шу сабабли сериалда ҳам шу ном қолдирилди», – деган у.