Москва вилоятида икки нафар юқори синф ўқувчиси 12 ёшли мактаб боласини шафқатсизларча ўлдирганликда гумонланяпти. Россия оммавий ахборот воситалари ва ҳуқуқ-тартибот идоралари маълумотларига кўра, қизлар жиноятни содир этишда машҳур «Калмар ўйини» сериалидан илҳомланган бўлиши мумкин.

Воқеа тафсилотлари

26 август куни 12 ёшли бола Кабаново қишлоғида бедарак йўқолади. Дастлаб бунга жиддий эътибор қаратилмайди, қидирив ишлари ҳам кўнгиллилар гуруҳи томонидан амалга оширилади. Орадан бир кун ўтиб унинг жасади кўплаб пичоқ жароҳатлари билан маҳаллий касб-ҳунар билим юртининг ташландиқ ётоқхонаси ертўласидан топилади. Жиноятни содир этганликда гумонланиб боланинг қўшнилари бўлган 15 ва 16 ёшли икки нафар қиз қўлга олинади. 

Телеграм-каналлар ва ОАВ ўзининг ҳуқуқ-тартибот идораларидаги манбаларига таяниб хабар беришича, юқори синф ўқувчилари қотилликни режа асосида амалга оширган, уларда олдиндан тайёрланган пичоқ ва қўлқоплар ҳам бўлгани айтиляпти. Бола йўқолган куни қизлар уни «пиво ичиш» баҳонасида сайрга чақирган ва ташландиқ бинога алдаб олиб кирган.

«Комсомолская правда»нинг  полициядаги манбасига кўра, қотиллар «одамлар қандай ўлишини» кўрмоқчи бўлишган. Баъзи манбалар эса қизлар қандайдир «видео челленж»ни бажарган ҳолда қотилликни телефонга тасвирга олганини иддао қиляпти. Бошқалар эса изни яшириш мақсадида гумондорлар атайлаб ўзлари билан мобил қурилмаларини олмаганини айтган. Жиноятдан сўнг улар хотиржамлик билан уйларига тарқалишган.

Сериал таъсири

Тергов версияларидан бирига кўра, ўсмир қизлар «Калмар ўйини» сериалига қаттиқ қизиққан. Улардан бирининг уйида сериалга оид плакатлар осилгани, ижтимоий тармоқлардаги саҳифасида эса кинодаги одам ўлдириш саҳналари жамланган видеолар бўлгани аниқланган.

Ҳалок бўлган боланинг онаси «мск1» нашрига берган интервьюсида қўлга олинганлар бошқа қотилликларни ҳам режалаштирганига урғу берган.
«Бу якуний хулосаларми ёки терговчиларнинг фикрими аниқ  билмайман. Улар бундай хулосага келишига қизлардан бирининг хонасида «Калмар ўйини» сериал постерлари осилгани сабаб бўлган”, деган у.

Шунингдек, қизларнинг ёнидан 50 кишилик рўйхат топилгани ва қурбон бўлган бола ҳам ўша рўйхатда бўлгани хабар қилиняпти.