Европарламент Брюсселдаги сессиясида Европа иттифоқининг 7 йиллик бюджетини тасдиқлади. Коронавирус пандемиясидан кейин тикланиш бўйича чораларни ўз ичига олган бюджет қиймати 1,8 трлн еврони ташкил қилади.
Еврокенгаш томонидан декабр бошида маъқулланган бюджет Европарламент томонидан кўпчилик овоз билан қабул қилинди.
2021-2027 йилларга мўлжалланган бюджетнинг асосий қисми 1,074 трлн еврони ташкил қилади ва кўп соҳаларнинг молиялаштирилишини ўз ичига олади. Яна 750 млрд евро Европа иттифоқига аъзо давлатларга коронавирусга қарши курашга ажратиш кўзда тутилган.
Бюджетда, шунингдек, Европа иттифоқининг 10та муҳим дастурига, жумладан соғлиқни сақлаш, “яшил иқтисодиёт” ва ҳужжатларни рақамлаштиришга ўтиш учун қўшимча 15 млрд евро ажратилиши кўзда тутилган. Европа парламенти президенти Дэвид Сассоли ушбу бюджетни “тарихий ондаги тарихий бюджет” деб атади ва у “экологик тозароқ ва адолатли Европага” асос солишини айтди.
Европарламент, шунингдек, қўшимча Умумевропа солиқларини киритиш бўйича йўл харитасини қабул қилди. Бу солиқлардан олинадиган маблағлар тўғридан тўғри Европа иттифоқи бюджетига тушади. Жумладан, пластик чиқиндиларга 2021 йилдан, рақамли компанияларга 2023 йилдан ва молиявий транзакцияларга 2026 йилдан солиқ киритишга келишилган.
