Terrafugia – самолётга айлана оладиган автомобил

Terrafugia компанияси АҚШ фуқаролик авиацияси федерал бошқармасидан (FAA) ўзининг учар автомобилининг учишга лаёқатлилигига доир сертификат олди.

Орзулар рўёби

Terrafugia – бу АҚШнинг Массачусетс штатининг Уобурн шаҳрида жойлашган Хитой корпорацияси бўлиб, Transition номли радиобошқарувли самолёт ва TF-X номли учар автомобил ишлаб чиқиш билан шуғулланади.

10 йиллик меҳнатдан сўнг АҚШ фуқаролик авиацияси федерал бошқармасидан (FAA) Terrafugia Transition’га Special Light-Sport Aircraft сертификатини берди ва учар автомобилга «яшил чироқ» ёнди. Бундай учар автомобилни бошқариш учун ҳайдовчилик гувоҳномаси ва спорт учувчиси гувоҳномаси зарур бўлади.

Қайсар муаллифларни фақат табриклаш мумкин, ахир универсал транспорт бўлган Transition’нинг илк савдолари 2015 йилга белгиланган, кейин 2019 йилга кўчирилганди. Сертификат эса энди олинди ва икки ўриндиқли илк гибрид моделлар 2022 йилда савдога чиқарилади.

Албатта, орзулар рўёбга чиқиши жудаям қувонарли ҳол. Яна бир-иккита майда ишлар қолган – йўлда ҳаракатланиш учун автомобил сертификати ва қанотларни йиғиб олиб шаҳар кўчаларини кезиш мумкин. Учар автомобилнинг асосий кўрсаткичлари:

• икки кишилик моделининг вазни 590 кг атрофида;
• ҳавода максимал тезлиги соатига 160 километр, энг юқори кўтарилиш баландлиги 3000 метр;
• йиғилувчи қанотлар кенглиги 8,2 метр;
• самолёт режимидан автомобил режимига ўтиш тезлиги – 1 дақиқадан камроқ;
• тахминий нархи 40 минг доллардан бошланади;

Rotax 912iS Sport двигатели авиация ёнилғиси ёки бензинда ишлайди. Автомобил режимида гибрид электродвигател ишга тушади.

Наҳотки келаси йил...?

Terrafugia компанияси учар автомобил 80 кунлик учиш синовларидан муваффақиятли ўтганини таъкидлашмоқда. Моделнинг барча жиҳатларини текшириш учун 150дан ортиқ техник ҳужжатлар FAA’га топширилди ва учиш учун Special Light-Sport Aircraft сертификати қўлга киритилди.

Terrafugia’нинг асосий концепцияси – автомобил эгаси ҳаво кенгликларини енгиб ўтиб, кичик аэропорт ёки йўлнинг ўзига қўниши, қанотларни йиғиб гаражга кириб кетиши мумкин. Қачонлардир шунақа бўлади.