Метрология соҳасида халқаро даражадаги калибрлаш хизмати йўлга қўйилди

Жорий йилнинг 22 март куни Ўзбекистон миллий метрология институтининг калибрлаш лабораториялари Туркиянинг аккредитатлаш агентлиги (TÜRKAK) томонидан халқаро даражада аккредитациядан ўтказилди.

Бунинг натижаси ўлароқ, Ўзбекистон миллий метрология институтининг масса, босим ва ҳарорат катталиклари бўйича кўрсатиладиган калибрлаш хизматлари Лабораториялар аккредитацияси бўйича халқаро ташкилот (ILAC) доирасида тан олинади.

Турк аккредитация агентлиги TÜRKAK сайтидаги аккредитациядан ўтган калибрлаш лабораториялари рўйхатига Ўзбекистон миллий метрология институти ҳам киритилди.

AB-0229-K “Uzbek National Institute of Metrology” номли файл билан калибрлаш йўналишида рўйхатга кириши Ўзбекистон миллий метрология институти салоҳиятининг яна бир поғонага кўтарилганини намоён этмоқда.

Бу билан ўз ўрнида республикада бажариладиган ўлчаш натижаларининг халқаро даражада метрологик кузатилувчанлигини таъминлашга ҳамда маҳаллий маҳсулотни чет элга етказиб беришда ўлчаш ва синаш натижаларининг тан олинишига эришилади. Энг муҳими, эндиликда калибрлаш лабораторияларининг баённома ва хулосалари 60 дан ортиқ давлатда тан олинади.