Европа футболи. Икки чемпионатда чемпионлар бугун аниқ бўлиши мумкин, Испанияда интрига сақланиб қолмоқда

Испания: Зидан Симеонени олдинга қўйиб юбормаяпти

«Эльче» — «Атлетико» — 0:1 (Льоренте, 23)

Пайшанба куни «Барселона» «Гранада»га сенсацион равишда мағлуб бўлгани (1:2) ва бунинг натижасида каталонияликлар турнир жадвалида яққол пешқадамга айланиб олиш имкониятини бой бергани жамоанинг рақобатчиларига илҳом берди. Ниҳоятда асабий кечган ўйин якунида «Атлетико» барибир уч очкога эга бўлди, бу ўйинда жароҳатдан кейин формасини энди тиклаётган Луис Суареснинг ҳеч омади келмади. Уругвайлик ҳужумчи биринчи бўлимда ҳет-трик муаллифи бўлиши ҳам мумкин эди, аммо у дарвозабон билан яккама-якка чиқиб бориб, яқин масофадан туриб тўпни дарвозага жойлай олмади, кейин VAR орқали офсайд қайд этилиб, унинг голи бекор қилинди ва яна бир вазиятда арбитр видеотакрорни кўргач, «Эльче» дарвозасига белгиланган пенальтини бекор қилди.

Лекин бу орада Льоренте рикошет орқали гол уриб, «матрасчилар»нинг бу мавсумдаги энг самарали футболчисига айланди - 12 гол ва 10 голли узатма. Бундай ўсиш ушбу яримҳимоячи позициясини ўзгартиргани билан изоҳланади, шанба оқшомида Ла Лигада 360-ўйинини ўтказиб, аргентиналик мураббийлар учун рекорд қайд этган Диего Симеоне уни ажойиб топилмага айлантирди. Мадридликлар дарвозабони Облакнинг хизматларини ҳам эътироф этиш керак, у Испания биринчилигида ўтказган ўйинлари сонини 225тага етказди. «Атлетико» легионерлари орасида бу учинчи кўрсаткич - фақат Годин (277) ва Филипе Луис (240) олдинда.

Бундан ташқари, словениялик дарвозабон — пенальтичилар учун қўрқинчли туш бўлишда давом этмоқда. Бу мавсумда унинг дарвозасига тўрт бор пенальти қўйилиб, унга фақат «Эйбар» дарвозабони Дмитрович гол ура олган, «Эльче»га қарши ўйинга қўшиб берилган дақиқаларда эса Облакнинг бу борадаги репутацияси Фиделни ҳаяжонлантирди. Шу вақтгача ўйин қаҳрамони бўлиб турган Льорентенинг қўлига тўп теккач, «нуқта»га яқинлашган Чавес Фидель устунни нишонга олди - тўп словакиялик дарвозабоннинг бармоқларига тегиб йўналишини ўзгартирганди. Дарвозабон мадридликлар учун муҳим ғалабани сақлаб қолди.

«Реал» — «Осасуна» — 2:0 (Эдер Милитао, 76. Каземиро, 79)

«Стэмфорд Бриж»га сафар олдидан Зинедин Зидан Кроос ва Модрични захирада қолдирди. Улар йўқлигида майдонда Азар илк дақиқаларданоқ ёрқин ўйин кўрсатди. У ўзи ҳам гол уришга яқин келди, шерикларини ҳам бир неча бор қулай вазиятларга чиқарди. Аммо биринчи бўлимда берилган 13 зарба (бу мадридликлар учун бу мавсумдаги рекорд кўрсаткич) мезбонларга натижа келтирмади.

Ўйиннинг якуний қисми бошланганида, «Реал» чемпионлик пойгасидан чиқиб кетиши ойдинлашиб қолганида, мадридликларни кутилмаган қаҳрамон қутқариб қолди. Ла Лигадаги биринчи голигача ҳам Эдер Милитао «Осасуна» дарвозаси қамалидаги фаол футболчилардан бири бўлиб турганди. У бурчакдан узатилган тўпни боши билан дарвозага йўллаб ҳисобни очди. Бир неча дақиқа ўтиб уюштирилган ҳужумда Бензема тўпни олдинга ташлаб берганидан кейин тўп Каземиронинг оёғига теггач, ўйин тақдири ҳал бўлди - бразилиялик яримҳимоячи бу вазиятда тўпга зарба бермаган, фақат уни ўзига ўнглаб олишга уринганди. Аммо бу ҳаракат рақиб дарвозабонини чалғитди ва тўп дарвоза тўрига юмалаб кириб кетди. Бу омадли гол Каземиро учун мавсумни фаолиятидаги энг самарали мавсумга айлантирди (6 гол). Қолаверса, бу унинг Испания чемпионатидаги юбилей — 200-ўййини бўлди. Энди, «Барселона» якшанба куни «Валенсия»га қарши ўйинда қандай натижа қайд этишидан қатъи назар, «Қироллик клуби» иккинчи ўринни ўзида сақлаб қолади.

Англия: Гвардиола давридаги 700-гол, Тухель Лэмпарддан ўзиб кетишга улгурди

«Кристал Пэлас» — «Манчестер Сити» — 0:2 (Агуэро, 57. Ферран Торрес, 59)

Хосеп Гвардиоланинг жамоаси Чемпионлар лигасида илк бор финалга чиққач, энди ички чемпионатда ҳам барчасини ҳал қилиб қўйишга яқин келди. «Шаҳарликлар» одатдаги каби тўпга эгалик қилишда устунлик қилишди, аммо барчаси автоматик амалга ошди. Иккинчи бўлим бошида эса Агуэро рақиб дарвозасини кучли зарбаси билан ўққа тутди, бу аргентиналик футболчи учун Европа лигаларида урилган 255-голга айланди. Бу тарихдаги 15-натижа, энди Кун барча даврлар бўйича рейтингда Европа-1984 чемпиони Бернар Лякомбо ва Англия терма жамоасининг ўтган асрнинг 50-йилларидаги тўпурари Нэт Лофтҳаус билан бир ўринда жойлашди.

«Сити» якшанба куниёқ чемпион бўлиши мумкин, агар «МЮ» турнинг асосий баҳсида «Ливерпуль»га мағлуб бўлса. Аммо шунда ҳам «шаҳарликлар» учун АПЛда яна бир интрига қолади. Шанба куни улар қаторасига 11-сафар ўйинида ғолиб бўлишди ва жамоа 2017 йилги ўз рекорди ва «Челси»нинг 2008 йилги рекордини такрорлади. Тарихдаги мутлақ энг яхши серия муаллифи бўлиш учун жамоа 14 май куни Ньюкаслдаги ўйинда ҳам уч очко олиши керак бўлади. Ҳозирча эса «Сити» Гвардиола давридаги голлари сонини 700тага етказиб қўйди. Бу голлар учун 288 ўйин ўтказиш етарли бўлган!

«Челси» — «Фулҳэм» — 2:0 (Ҳаверц, 10, 49)

Кўклар «Реал»га қарши жавоб ўйинидан олдин асосий таркибнинг ярмига дам бериб ҳам Чемпионлар лигаси йўлланмасидаги муҳим ўйинда ғалаба қозонди. Шу билан бирга, аутсайдерга қарши ўйинда дарвозани «қуруқ» сақлаши учун Менди бир неча сэйв амалга оширишига тўғри келди. Қолаверса, Маунтнинг юқори савияли ўйини ва Ҳаверцнинг аниқ ўйнаши ғалабани таъминлади. Жамоанинг ҳозирги натижаси — Томас Тухелнинг хизматлари. Германиялик мутахассис келганидан буён «Челси» чемпионатдаги 15 ўйинда 32 очко жамғарди. Бу эса 19-турдан кейин ишдан бўшатилган Фрэнк Лэмпарднинг натижасидан яхшироқ.

Италия: «Интер»нинг чемпионлигини фақат «Аталанта» кечиктириши мумкин

«Кротоне» — «Интер» — 0:2 (Эриксен, 69. Ҳакими, 90+2)

Сўнгги етти турда Италия чемпионати етакчиси футболчилари ўн марта дарвоза устуни ёки тўсинини нишонга олган. Миланликларнинг унгача бўлган даврда бу борада қайд этган кўрсаткичи 10тага тенг бўлганди. «Кротоне»га қарши ўйиннинг биринчи бўлимида ҳам тўп икки марта устунга тегди, нолли дуранг сақлаб қолинса, мезбонлар лигада қолиш учун имконият сақлаб қолган бўларди. Аммо иккинчи бўлимда Антонио Конте туширган футболчилар орадаги савияни кўрсатиб қўйишди ва бу жамоа қуйи дивизион учун йўлланмани расмийлаштирди.

Ўйинни захира ўриндиғида бошлаган Эриксеннинг узоқдан берган зарбаси ҳал қилувчи бўлди, биринчи бўлимда гол ура олмаган Лукаку эса унга ассистентлик қилди. Энди бельгиялик футболчида 21 голдан ташқари 10та голли узатма ҳам бор. Ўтган мавсумдаги натижасини такрорлаб, очколари сонини 82тага етказган «Интер»га энди «Ювентус» етиб ололмайди, «Кекса синьора»нинг 9 йиллик гегемонлик даврига расман барҳам берилди. Математик жиҳатдан фақат «Аталанта»да Конте жамоасига етиб олиш имкони бор, аммо бу жамоа якшанба куни «Сассуоло»ни енга олмаса, миланликлар клуби «диванда ўтириб» чемпионга айланиши мумкин. Бошқа томондан «Интер» футболчилари сўнгги ўйиндаги ғалабадан кейиноқ ўзларини чемпион деб ҳисоблай бошлашди. Агар бугун «Аталанта» ўз ўйинида ғалаба қозонса ҳам, «Интер» сўнгги тўрт турда бир очко жамғариши чемпионлик учун кифоя бўлади.

«Интер» ещё не стал чемпионом, но уже во всю гуляет 😃

Если сегодня «Аталанта» не возьмёт 3 очка, «интеристы» официально примерят на себя звание победителя Серии А pic.twitter.com/fESTwOS28L

— Чемпионат (@championat) May 2, 2021

«Милан» — «Беневенто» — 2:0 (Ҳоқон Чолхонўғли, 6. Эрнандез, 60)

Миланнинг иккинчи жамоаси эса аллақачон чемпионлик пойгасини тарк этган, сўнгги ўйинлардаги икки мағлубият эса жамоани ЕЧЛга йўлланма берадиган квартетдан ҳам чиқариб юборганди. Аммо хавфли ҳудудда турган «Беневенто» устидан қозонилган ғалаба жамоага яна тўртликка қайтиш имконини берди. Бу ўйинда Чолхонўғли тезкор гол уриб, кучли бешлик чемпионатларидаги голлари сонини 50тага етказиб олди. Ўйин давомида рақиблар бир неча бор «Милан» дарвозасига хавф солишди, иккинчи бўлим бошида Эрнандез Ибраҳимовичнинг зарбасини дарвозага тўғрилаб қўйгач эса ўйин тақдири ҳал бўлди. Қизил-қоралар 2013 йилдан кейинги энг кўп очкосини жамғариб туришибди - 69 очко ва бешинчи ўриндан иккинчи ўринга юқорилаш. Стефано Пиоли «Аталанта», «Ювентус» ва «Наполи» бунга қандай реакция беришини кутади.

Франция: Париж тўрт соат етакчилик қилди

«ПСЖ» — «Ланс» — 2:1 (Неймар, 33. Маркиньюс, 59 — Ганаго, 61)

«Лилль» — «Ницца» — 2:0 (Бурак Йылмаз, 13. Зеки Челик, 56)

«Монако»нинг чемпионлик титули учун рақиблари монегаскликларга орадаги фарқни оширишга йўл беришмаяпти. Мбаппесиз ўйнаган «ПСЖ» «Ланс»га қарши ўйинда жиддий қаршиликка дуч келди (мавсум дебютанти бўлган жамоа ҳозирда бешинчи ўринда бормоқда). Аммо меҳмонларнинг илк хатосиёқ Неймарнинг голи билан якунланди. У ўйин якунида 2020 йил якунлари бўйича Европадаги энг яхши бразилиялик футболчилар учун аталган «Олтин самба» совринини қабул қилиб олди.

У бурчак зарбасидан узатма бериб, Маркиньосга иккинчи голни уришда ёрдам берди. Неймар «ПСЖ» сафидаги барча турнирлар доирасидаги ўйинларда урилган голларнинг 130тасида иштирок этган. Унинг ўзи парижликларнинг жами 111 ўйинида 85 гол урган ва 45 голга ассистентлик қилган. Бразилиялик — Лига 1нинг энг самарали футболчиси, Франция чемпионлари Маурисио Покеттино келганидан буён илк марта қаторасига тўрт ўйинда ғалаба қилиб, биринчи ўринга чиқишди.

Аммо бу етакчилик тўрт соат давом этди, кун охирида «Лилль» Бурак Йилмазнинг саъй-ҳаракатлари эвазига «Ницца»ни мағлаб этди. Ўтган турда 35 ёшли турк Лиондаги ўйинни ўзгартирганди. Бу ўйинда эса у ҳисобни очди, унинг терма жамоа бўйича ҳам сафдоши бўлган Зеки Челик иккинчи бўлим бошида интригани ўлдирди. «Ницца» бу вақтга келиб камчилик бўлиб қолганди ва ҳисоб йириклашиб кетмаслиги учун ўйнади.

Германия: Ҳоландсиз ҳам йирик ҳисоб

«Боруссия» Д — «Хольштайн Киль» — 5:0 (Рейна, 16, 22. Ройс, 26. Т.Азар, 32. Беллингем, 42)

Германия Кубогида «Лейпциг» ортидан Дортмунднинг «Боруссия» клуби иккинчи финалчига айланди. Бир ҳафтадан кейин бу жамоалар бундеслигада репитиция қилишади, бу ўйин Дортмунд учун Чемпионлар лигаси йўлланмаси учун муҳим жангга айланади. Шанба куни ҳам «асаларилар» юқори дивизионга чиқиш учун ҳаракат қилаётган жамоани янчиб ташлади, бу жамоа кубок «Бавария»ни енгиб, сенсация қилганди.

Шанба куни эса «Хольштайн Киль» жароҳат туфайли ўйинда Ҳоланд иштирок эта олмаган бўлса-да, рақибдан бешта гол ўтказди. Дортмундликларнинг дастлабки тўрт голи беш зарбадан кейин урилди ва 32-дақиқага келиб ҳисоб 4:0 кўринишига келди. Бўлим охирида Беллингем ўйинга якуний нуқтани қўйди - немислар клуби Германия Кубоги ярим финалида шу вақтгача бешта гол уришмаганди.

Кун статистикаси

• Туркия чемпионати тарихида биринчи бўлимда илк бор 5 гол урган жамоа «Бешиктош» бўлди.
• «Верона» футболчилари бу мавсумда 19 бор рақиб дарвозалари тўсинлари ёки устунларини нишонга олган. Бу 2005 йилдан буён А Серия жамоалари учун энг омадсиз натижа.
• «Атлетико» ярим ҳимоячиси Коке Ла Лигадаги ўйинлари сонини 350тага етказди. Клуб тарихида ундан кўпроқ ўйин ўтказган футболчилар Абелардо (410) ва Реньонес (367) бўлиб турибди.