Байден Британияда қироллик протоколини бузди

АҚШ президенти Жо Байден Британияда ўтаётган «Катта еттилик» саммитида қироллик протоколини бузди. Протокол қоидаларига кўра, Корнуолл графлигида ўтган тантанали қабулга охирги бўлиб Британия қироллик оиласи аъзолари келиши керак бўлган. Бироқ Байден ўз рафиқаси билан учрашувга Британия қироличаси Елизавета II’дан 5 дақиқа кейин келган.

АҚШ президенти қабулга келганда у ерда уни қиролича, шаҳзодалар Чарлз ва Уилям ҳамда уларнинг рафиқалари Камилла Паркер Боулз ва Кейт Миддлтон кутиб туришган бўлган.

Бироқ АҚШ етакчиси томонидан йўл қўйилган ушбу жузъий камчилик қиролича кайфиятига таъсир кўрсатмаган. У барча меҳмонлар, жумладан, Байден билан хушмуомала бўлган.

Таъкидлаш жоиз, бу Байден президент лавозимига киришгандан кейин унинг қиролича Елизавета II билан илк учрашуви бўлди.

Қироллик протоколига кўра, Британиядаги барча тантанали ва расмий тадбирларга меҳмонлар қироллик оиласидан олдин келишлари керак. Бундан ташқари, меҳмонлар тадбирларни қироллик оиласидан олдин тарк этишлари белгилаб қўйилган.