Деҳқонободда ерлари тортиб олинган тадбиркорлар муаммоси вилоят ишчи гуруҳи томонидан ўрганиб чиқилади

Деҳқонободда ерлари тортиб олинган коврак етиштирувчи тадбиркорлар муаммоси вилоят ишчи гуруҳи томонидан ўрганиб чиқилади. Бу ҳақда бугун, 28 июль куни Қашқадарё вилояти ҳокимининг биринчи ўринбосари Нодир Эркаев раҳбарлигида Деҳқонободда ўтказилган сайёр қабул пайтида маълум қилинган.

Қайд этилишича, бугун, 28 июль куни Қашқадарё вилояти ҳокимининг биринчи ўринбосари Нодир Эркаев раҳбарлигида Деҳқонободда сайёр қабул ўтказилган. Сайёр қабулда ерлари тортиб олинган коврак етиштирувчи тадбиркорлар ҳам қатнашган ва ўзлари дуч келаётган муаммога ижобий ечим сўрашган.

Тадбиркорлардан бири вилоят ҳокимининг биринчи ўринбосарига жами 21 нафар тадбиркорнинг ери олиб қўйилганини билдирган. Унинг айтишича, коврак етиштирувчи тадбиркорлар 2014-2019 йиллар оралиғида соҳага доир доривор ўсимликларни етиштириш ва қайта ишлашни ривожлантириш тўғрисидаги фармон ва қарорлар билан қонуний тарзда 25 йилдан 49 йилгача бўлган муддатлар учун шартнома имзолаб ер олишган.

Унинг таъкидлашича, Президентнинг 2020 йил 2 сентябрдаги «Ўзбекистон Республикаси пиллачилик ва қоракўлчиликни ривожлантириш қўмитаси фаолиятини ташкил этиш тўғрисида»ги фармони қабул қилингач, тегишли масъуллар уни нотўғри ижро қилган. Шу сабаб тадбиркорларга тегишли ерлар уларнинг розилигисиз тумандаги барча ер майдонлари қаторида қўмита ихтиёрига ўтказиб юборилганини айтиб, ўртада тадбиркорлар жабрланганини билдирган.

Сайёр қабул давомида ерлари тортиб олинган коврак етиштирувчи тадбиркорларнинг муаммоси эшитилгач, уларга бу масалада вилоят ҳокимлиги қошида ишчи гуруҳи тузилганини ва унинг хулосасига кўра, юқори ташкилотларга таклифлар киритилиши маълум қилинган.

Маълумот учун,  2021 йил 8 июлда президентнинг «Республикада мавжуд яйловлардан унумли фойдаланиш, ипак ва жунни қайта ишлашни қўллаб-қувватлаш бўйича қўшимча чора-тадбирлар тўғрисида»ги қарори эълон қилинган. Мазкур қарорнинг 6-бандига асосан, эндиликда жисмоний ва юридик шахслар Пиллачилик ва қоракўлчиликни ривожлантириш қўмитасининг доимий эгалигидаги яйловлар ҳудудида доривор ўсимликларни, шу жумладан, коврак ўсимлигини йиғиш, экиш ва етиштириш учун қўмита билан ижара шартномаси тузиб, унда белгиланган ҳудудларда режасини амалга ошириши белгилаб берилган.

Президентнинг 2020 йил 2 сентябрдаги «Ўзбекистон Республикаси пиллачилик ва қоракўлчиликни ривожлантириш қўмитаси фаолиятини ташкил этиш тўғрисида»ги фармонига кўра, Деҳқонобод туманидаги барча – 177 минг гектар ер майдони Пиллачилик ва қоракўлчиликни ривожлантириш қўмитаси ҳисобига ўтган. Шу жумладан, туманда фаолият олиб борган ва ҳар йили ўртача 5-6 миллион долларлик экспорт кўрсаткичларига эга бўлган 21 нафар коврак етиштирувчи тадбиркорларнинг ерлари ҳам қўмита ҳисобига ўтиб кетган.