Туркиядаги ўрмон ёнғини иссиқлик электр станциясига хавф солмоқда

Туркиянинг Миляс шаҳрида ўрмон ёнғинлари иссиқлик электр станцияси яқинига етиб борди. Бу ҳақда шаҳар мэри Муҳаммад Тоқат маълум қилди.

Унинг сўзларига кўра, ёнғинни назорат қилиб бўлмаяпти ва у хавфли нуқтага етган.

Туркияда бир ҳафтадан буён ўрмон ёнғинлари давом этмоқда. 

Аввалроқ мамлакат қишлоқ ва ўрмон хўжалиги вазири Бекир Пакдемирли 132та ёнғиндан 125таси назорат остига олинганини айтганди.

Мамлакатнинг 32 вилоятида ёнғинлар қайд этилган. Табиий офат оқибатида саккиз киши ҳалок бўлган. 

Ёнғинларни ўчириш учун Хорватия, Испания, Россия, Украина, Озарбойжон ва Эрон ўт ўчирувчи самолётларини жўнатган.