«Бу спортимиз тарихида улкан натижа» – Шавкат Мирзиёев спортчиларнинг олимпиададаги иштирокини юқори баҳолади

Бугун, 13 август куни президент Шавкат Мирзиёев иштирокида XXXII ёзги олимпиада ўйинлари иштирокчи ва ғолиблари, уларнинг ота-оналари ҳамда мураббийларини тақдирлаш маросими бўлиб ўтмоқда.

Kun.uz мухбирига кўра, маросимда давлат раҳбари спортчиларнинг нуфузли мусобақадаги иштирокини юқори баҳолаб, бу мустақилликнинг 30 йиллигига муносиб совға бўлганини таъкидлаган.

«Барчамиз дунёдаги энг нуфузли ана шу мусобақаларда Ўзбекистон вакилларининг ҳар бир чиқишини катта қизиқиш ва ҳаяжон билан кузатиб бордик.

Ўз навбатида, спортчиларимиз ҳам бундай юксак ишончни оқлаб, халқимизга ёрқин ғалабаларни тортиқ́ этишди.

Ҳеч шубҳасиз, бу ватанимиз мустақиллигининг 30 йиллик шонли байрамига муносиб совға бўлди», деди президент.

Давлат раҳбари спортчиларнинг олимпиада ўйинларида 3та олтин ва 2та бронза медални қўлга киритганини алоҳида таъкидлар экан, бу борада Ўзбекистоннинг ўрни МДҲ ва Марказий Осиёда юқори бўлганига ҳам эътибор қаратди.

«Ҳаммамизга аёнки, халқаро олимпия ўйинларида ер юзининг энг зўр, манаман деган спорт усталари иштирок этади.

Буюк Алишер Навоий бобомиз айтганларидек, шерга қарши шердек курашиш, жанг қилиш керак. Сизлар дунё тан олган спортчилар билан мардона олишиб, уларнинг ўзини ҳам, улар эришган натижаларни ҳам ортда қолдириб, 3та Олимпия рекордини янгилаб, жаҳон спортида ҳам ёрқин саҳифа очдингиз.

Мамлакатимиз жамоаси 200дан зиёд давлатдан келган энг кучли спортчилар орасида умумжамоа ҳисобида – ўттиз иккинчи, Мустақил Давлатлар Ҳамдўстлигида – иккинчи, Марказий Осиёда эса – биринчи ўринни эгаллади. Бу чиндан ҳам ўзбек спорти тарихидаги улкан натижадир.

Ғолиб фарзандларимиз шаънига мадҳиямиз янграб, Ватанимиз байроғи баланд кўтарилган дамларда, барчамизнинг қалбларимиз чексиз ғурурга тўлди.

Бугунги тантанали маросимда иштирок этаётган қаҳрамон ўғлонларимиз – Токио олимпиадаси ғолиблари ҳақида ҳар қанча фахрланиб гапирсак арзийди, албатта», деди Шавкат Мирзиёев.

Маросимда давлат раҳбари олимпия ўйинларида ғолиб бўлган спортчиларнинг иштирокини қандай кузатгани ҳақида гапириб берди.

«Тўғриси, Улуғбекнинг (Улуғбек Рашитовнинг – таҳр.) жангида охирги раундни кўролмадим ҳам. Ютқазиб қўйишидан хавотирландим. Баҳодирнинг жангида ҳам шундай бўлди. Биринчи раунддан кейин Баҳодир ютқазаётганди, кейингиларини кўролмадим. Лекин ишондим.

Жангидан бир кун олдин Баҳодирга телефон қилмоқчи бўлдим. Телефон қилиб, унга айтмоқчи эдимки, «Баҳодир сени зарбангни қабул қилган спортчи ҳеч қачон эсдан чиқармайди, унутолмайди».

Биласизлар, Баҳодирнинг жанги куни Туркманистонда, Марказий Осиё давлатлари раҳбарлари йиғилишида эдим. Мен уларга айтдимки, «Баҳодир барибир ютади». Улар мендан бу ишончнинг сабабини сўраганда айтдимки, агар ҳакамлар ҳаққоний бўлса, бизнинг боксчи албатта ютишини айтдим», деди президент.