Samsung Electronics вице-президенти ва Samsung Group компаниялари гуруҳининг норасмий раҳбари Ли Жэ Ён 13 август куни қамоқдан муддатидан аввал шартли равишда озод этилди. У шу йил бошида коррупция иши бўйича 2,5 йилга озодликдан маҳрум этилганди.
Yonhap ахборот агентлигининг хабар беришича, Ли Жэ Ён 15 августда нишонланувчи Корея озод қилиниши куни муносабати билан афв этилган 810 маҳкумдан бири бўлди. У қамоқни тарк этиши вақтида журналистлар билан суҳбатда ўз қилмишлари учун яна бир бор узр сўраган.
Samsung асосчисининг набираси Ли Жэ Ён 2017 йилда маблағларни талон-торож қилиш, пора бериш ва ёлғон кўрсатма беришда айбланиб, 5 йилга озодликдан маҳрум қилинган. 2018 йил февралда Сеул олий суди Ли Жэ Ённинг аппеляциясини кўриб чиқиб, қамоқ жазосини шартли жазога ўзгартирган. Шундан кейин у озодликка чиқарилган.
Бироқ 2021 йил январида суд Ли Жэ Ённи Жанубий Кореянинг собиқ президенти Пак Кин Хега пора беришда айблаб, 2,5 йилга озодликдан маҳрум қилган. Ўша ойда Жанубий Корея олий суди Пак Кин Хени 20 йилга озодликдан маҳрум қилиш тўғрисида ҳукм чиқарган.
