Россияда ковид қурбонлари сони бўйича янги антирекорд, ҳудудларда комендантлик соати жорий этилмоқда

Инфекцияга қарши кураш бўйича тезкор штаб маълумотларига кўра, сўнгги бир кунда Россияда коронавирусга чалинган 1106 киши вафот этди. Бу пандемия давридаги рекорд кўрсаткич саналади, аввалги максимум ўтган ҳафтанинг шанба куни қайд этилганди - 1075 ўлим.

Коронавирус билан боғлиқ ўлимлар сони қаторасига саккизинчи кун 1 мингдан юқори бўлмоқда. Бир кун олдин расмий статистика бўйича Covid-19 билан боғлиқ 1069 ўлим, якшанба куни эса - 1 072 ўлим рўйхатга олинганди.

Энг кўп қурбонлар Москвада қайд этилмоқда - 86 (бир кун олдин 83 эди), шунингдек, Петербургда 72, Краснодар ўлкасида - 40 киши вафот этган. Июнь ойи охирларида Москвада кунига 120 атрофида ўлим ҳолатлари рўй берган, Петербургда ҳам ўлим даражаси шунга яқин бўлганди.

Штаб маълумотларига кўра, мамлакатда жами ўлим ҳолатлари 232 775тага етган. Росстатда эса рақамлар кўпроқ, унга кўра пандемия даврида коронавирусга чалинган россияликларнинг 400 мингдан ортиғи вафот этган.

Шу билан бирга, Covid-19га чалиниш бўйича кунлик ҳолатлар пасая бошлади - бир кун олдин 37 930 ҳолат қайд этилган (бу пандемия давридаги янги рекорд бўлганди), бугун эса яна 36 446 кишига ташхис қўйилгани тасдиқланди, якшанба куни бу кўрсаткич 35 660тани ташкил қилган.

Аввалги кунларда бўлгани каби, касалланиш асосан Москвадаги ҳолатлар эвазига пасаймоқда - Россия бўйича пасайиш 1 484 ҳолатга тенг бўлгани ҳолда, пойтахтда пасайиш 1 704 ҳолатни ташкил этган (сўнгги кунда 6 074та янги ҳолат қайд этилган), яъни қарийб 22 фоизга. Москва областида бир кун олдинги 3 127 ўрнига 2 930 ҳолат қайд этилган, Петербургда ўсиш кузатилган - 2 693дан 2 735га.

Илк комендантлик соати

Шу ҳафтада Россияда ишланмайдиган кунлар амал қилиши бошланади: 30 октябрдан бутун мамлакат бўйлаб, 28 октябрдан - Москвада. Айрим регионларда бу режим душанба куниёқ кучга кирган.

Москва ва Петербургда қисман локдаун эълон қилинган - унга кўра бу шаҳарларда фақат озиқ-овқат маҳсулотлари сотиладиган дўконлар, дорихоналар, эмлаш пунктлари ва яна бир қанча ташкилотлар ишлашига рухсат берилади. Ресторанлар, кафе ва барлар 7 ноябрга қадар ёпиқ туради. Москва расмийлари шу кунларда ҳозирча локдаун муддати узайтирилиши кўзда тутилмаётганини маълум қилди.

Хакасияда ковид туфайли комендантлик соати жорий этилди - бу Россиянинг шундай чора қўлланган илк регионидир. 28 октябрдан эътиборан республикада кечки соат 22:00дан эрталабки соат 6:00га қадар яшаш жойини тарк этиш тақиқланади. Ишлашига рухсат берилган корхоналар ходимлари бундан мустасно.

Ҳудудда 7 ноябрга қадар жамоат транспорти фаолияти тўхтатилади. Таксичилар фақат эмланганлик ҳақидаги сертификат билан ишлаши мумкин. 60 ёшдан катталар учун ўзини иҳоталаш режими амал қилади. Озиқ-овқат маҳсулотлари сотилмайдиган дўконлар ёпилган.

Роспотребнадзор Свердловск областида ҳам ишланмайдиган кунларда локдаун жорий этишни таклиф этган - барча тадбирларни бекор қилишни, кафе ва ресторанларни ёпишни, мактаблар ва болалар боғчаларида таътил эълон қилишни (Москвадаги кўплаб мактаблар душанбадан таътилга чиққан).

Президент Владимир Путин фармони асосида ишланмайдиган кунлар эълон қилиниши муносабати билан сайёҳлар кўпайиши эҳтимоли туфайли айрим регионлар қўшимча чоралар жорий этган. Бу ҳудудларда меҳмонхоналарга фақат коронавирусга қарши эмланган мижозлар қабул қилинади. Калининград областида (пандемия вақтида сайёҳлар учун машҳур бўлган йўналиш) чегаралар ёпилган - ишланмайдиган кунлар бу ҳудудда ҳам 28 октябрдан бошланади.

«Москвада локдаун режалаштирилмаяпти»

Расмийлар касалланиш даражаси ва ўлим ҳолатлари сони юқори бўлиб кетганини вакцинация жуда паст темпларда олиб борилгани билан изоҳлаган. Шу билан бирга, Роспотребнадзор раҳбари Анна Попова одамлар вакцина қабул қилишни хушламаслигини давлатга ишончсизлик билан боғламаслигини айтган. «Мен бу позицияга қўшилмайман», деган у Биринчи каналдаги «Познер» дастурида.

Попова киритилган коронавирус чекловларини локдаун деб атаётганларга ҳам қўшилмаслигини билдирган. «Олдиндаги дам олиш кунлари - локдаун эмас. Мен бундай деб ҳисобламайман, одамлар ўз оила аъзолари билан кўпроқ мулоқот қилиб, кўпроқ вақтини очиқ ҳавода ўтказиши мумкин», деган у. Унинг сўзларига кўра, сентябрь ойи охиридан касаллик тарқалиши тезлашганини секинлаштириш ва занжирларни узиш учун шундай йўл тутиш керак.

Путиннинг матбуот котиби Дмитрий Песков ҳам сешанба куни, «Москвада локдаун йўқлиги ва бу режалаштирилмаётгани» ҳақида гапирди.

Россия соғлиқни сақлаш вазири Михаил Мурашко мамлакатдаги эпидемиологик вазият бўйича қуйидагиларни маълум қилди:

• Айни вақтда мамлакатдаги ковид-касалхоналарда ўринларнинг атиги 12 фоизи бўш;
• Вазият оғирлашгани туфайли 13 регионда чекловларни қатъийлаштиришга зарурат бор;
• 268,5 мингдан ортиқ бемор шифохоналарга ётқизилган, шундан 11 фоизи оғир аҳволда;
• 60 мингдан ортиқ болалар коронавирусга қарши даволанмоқда, уларнинг ярмида - ковиднинг яққол аломатлари кузатилган.