Америка ҳарбийлари космик фазони назорат қилиш учун мўлжалланган қуролларни ер атрофидаги орбитага олиб чиқишди. Бу ҳақда АҚШ Ҳарбий-ҳаво кучлари вазири Трой Мейнк маълум қилди, деб хабар берди Air & Space Forces.
«Биз қаерда пайдо бўлишидан қатъи назар, ўзгарувчан таҳдидларга тайёрликни таъминлашда давом этамиз. Шунинг учун АҚШ энди коинотни назорат қилиш учун орбитада жойлаштирилган, қуролли кучларимизни душман ҳаракатларидан ҳимоя қила оладиган қуролларга эга», — деди Мейнк АҚШ ҳаво ва космик кучлари ассоциацияси конференциясида.
Нашрнинг таъкидлашича, бу Америка расмий вакили АҚШ бевосита орбитада жойлаштирилган қуролга эга эканини очиқчасига тасдиқлаган биринчи ҳолатдир. Шу билан бирга, вазир айнан қайси қурол ҳақида гап кетаётганини ошкор қилишдан бош тортди.
АҚШ аввалроқ Россияни коинотда бошқа сунъий йўлдошларга таҳдид солиши мумкин бўлган тизимларни жойлаштирганликда бир неча бор айблаган. 2024 йилда Вашингтон Россия бошқа космик аппаратларга ҳужум қилиши мумкин бўлган сунъий йўлдошни орбитага чиқарганини маълум қилди. Шунда Америка ҳукумати Россия коинотга ядровий зарядли сунъий йўлдош чиқариши мумкинлиги ҳақида огоҳлантирган эди. Москва бу баёнотларни «ҳийла» деб атаган. Шу билан бирга, Россия БМТ Хавфсизлик Кенгашида коинотга ядро қуролини жойлаштиришга йўл қўймаслик тўғрисидаги резолюцияни блоклаган эди.
