Бокс бўйича ЖЧ. Ўзбекистонликлардан фақат икки киши яримфиналга етиб келди

Белградда ўтаётган бокс бўйича жаҳон чемпионатида чоракфинал баҳслари якунланди. Ўзбекистон бокс жамоасининг чоракфиналга етиб келган 6 нафар вакилидан тўрт нафари мағлубиятга учради ва турнирни медалсиз якунлади. Икки нафар боксчи камида бронза медални кафолатлади.

Дастлаб энг енгил вазн тоифаси (-48 кг) вакили Нодиржон Мирзаҳмедов чоракфиналда қозоғистонлик Темиртас Жуссуповга қарши жанг ўтказди ва имкониятни бой бериб қўйди (0:5).

Нодиржон Мирзаҳмедов аввалги босқичда ирландиялик Рикки Несбитт устидан ғалаба қозонган эди.

-60 кг вазн тоифасида Ўзбекистон шарафини ҳимоя қилаётган Абдумалик Ҳалоков россиялик Всеволод Шумковга қарши рингга кўтарилди. Учала раундда ҳам Абдумалик устунлик қилди ва 5:0 ҳисобида ғалаба қозониб, ўзи учун медални нақд қилди (яримфиналда ютқазган боксчилар ҳам автоматик равишда бронза медаллар билан тақдирланади).

Абдумалик Ҳалоков аввалги босқичларда македониялик Жасин Ляма, словениялик Тадей Чернога устидан ғалаба қозонганди.

Унинг яримфиналдаги рақиби эронлик Даниял Шоҳбахш бўлади.

Чоракфиналга етиб келган ўзбекистонликлар орасида медал учун асосий даъвогарлардан бири сифатида қаралган Саиджамшид Жаъфаров кутилмаганда мағлуб бўлди. -75 кг вазн тоифаси вакили бўлган Жаъфаров 1/4 финалда таиландлик Випарон Жонгжохога қарши рингга кўтарилди. Ўзбекистонлик спортчи жанг давомида устунлик кўрсатган бўлса-да, ҳакамлар таиландлик боксчига 3:2 ҳисобидаги ғалабани тақдим этди. 

Саиджамшид Жаъфаров аввалги босқичларда словакиялик Лукас Фернэтса, япониялик Юито Мариваки ва озарбойжонлик Миршариф Казимзаде каби рақибларни мағлуб этганди.

Куннинг ўзбекистонликлар иштирокидаги тўртинчи жангида энг оғир вазн тоифаси вакили (+92 кг) Лазизбек Муллажонов арманистонлик Давид Чалоянга қарши рингга кўтарилди. Тенг курашлар остида ўтган баҳс Чалояннинг 3:2 ҳисобидаги ғалабаси билан якунланди.

Муллажонов аввалги босқичларда эронлик Амири Пуриа ва англиялик Делисиус Орье тўсиғидан ўтганди.

Турнир кашфиётларидан бири бўлган Мужибилло Турсунов ҳам амалдаги жаҳон чемпионига енгилиб, юришини чорак финалда тўхтатди. -63,5 вазн тоифаси вакили бўлган ушбу ёш боксчи амалдаги жаҳон ва Олимпиада чемпиони ҳисобланган кубалик Энди Крузга қарши тенгма-тенг кураш олиб борди. Аммо уч раунд якунларига кўра кубалик боксчига 3:2 ҳисобидаги ғалаба берилди.

Турсунов аввалги босқичларда япониялик Тайга Иманага ва Хитой Тайпейи вакили Чу Ен Лаи устидан ғалаба қозонганди.

Куннинг сўнгги жангида ўзбекистонликлардан яна бир киши яримфиналга чиқди. -92 кг вазн тоифасида Ўзбекистон шарафини ҳимоя қилаётган Мадиёр Саидраҳимов англиялик Льюис Уильямсга ҳеч қандай имконият қолдирмади ва ҳакамлар унинг 5:0 ҳисобидаги ғалабасини тан олишди.

Саидраҳимов бундан аввалги босқичларда беларуслик Владислав Смягликов ва қозоғистонлик Айбек Оралбай устидан ғалаба қозонганди.

Унинг финал йўлидаги навбатдаги рақиби - кубалик Хулио Ла Круз бўлади. 

Яримфинал баҳслари 4 ноябрь куни ўтказилади.

Шу тариқа, Ўзбекистон бокс жамоасининг турнирга олиб борилган 13 нафар вакилидан фақат 2 нафари финал остонасига етиб келди - бунгача Одилжон Аслонов, Асадхўжа Мўйдинхўжаев ва Шаҳобиддин Зоиров 1/8 финалда юришини тўхтатганди, Ҳасанбой Дўсматов, Шоҳжаҳон Абдуллаев, Миразизбек Мирзахалилов ва Шаҳрам Ғиёсов илк босқичдаёқ турнирни тарк этганди.