«Навбаҳор» ва «Пахтакор» ўртасидаги учрашувлар доим кескин курашларга бой бўлган. Бу гал ҳам шундай бўлди. Фақат ўйиндан кейин мухлислар майдондаги футболдан кўра ҳакамлик қарорлари, икки клуб медиаси ўртасидаги даҳанаки жанг ва чемпионатдаги адолат масаласини кўпроқ муҳокама қилишмоқда.
Намангандаги дуранг ва можарога сабаб бўлган гол
Суперлиганинг 24-туридан ўрин олган «Навбаҳор» – «Пахтакор» баҳси ҳар қачонгидан ҳам катта аҳамиятга эга эди. Турнир жадвалида пешқадамлик қилаётган «шерлар» учун очко йўқотиш чемпионлик пойгасидаги устунликдан маҳрум бўлишни англатарди. «Навбаҳор» эса чемпионлик учун курашга қайтиш йўлида сўнгги имкониятларидан бирини ишга солиши керак эди.
Наманганда 20 мингдан ортиқ мухлис қаршисида кечган учрашувни «Пахтакор» яхшироқ бошлади. Биринчи бўлимда Зайд Таҳсиннинг голи меҳмонларни ҳисобда олдинга олиб чиқди.
Иккинчи бўлимда «Навбаҳор» ҳужумларини кучайтирди. Мезбонлар пеналти ишлаб олишди, бироқ ундан фойдалана олишмади. Шунга қарамай, учрашув охирида Муҳаммадқодир Ҳамралиев ҳисобни тенглаштирди.
Қизиғи, Ҳамралиев аввал «Пахтакор» сафида ҳаракат қилган. У голни собиқ жамоасининг захира ўриндиғи томон қараб, ўзига хос тарзда нишонлади. Кейинчалик айнан шу ҳаракат икки клуб ўртасидаги тортишувга сабаб бўлди.
Бироқ дастлаб жанжал гол нишонланиши эмас, ҳакамлик қарорлари атрофида бошланди.
«Бизга футбол ўйнашга қўйишмади» — Камолиддин Тожиевнинг эътирози
Учрашувдан кейинги матбуот анжуманида «Пахтакор» бош мураббийи Камолиддин Тожиев ҳакамликдан очиқчасига норозилик билдирди.
«Мен шу кунга қадар ҳакамлик масаласида бир оғиз ҳам фикр билдирмадим. Лекин бугун бизга ўйнашга қўйишмади. Дарвозамизга белгиланган пенальтида футболчимиз шунчаки рақибнинг ёнида югуриб кетаётганди. Фламарион эса жарима майдончасида қўлидан тортилиб, йиқитилди, аммо пеналти берилмади.
Гапирмайман дейман-у, лекин гапирмаса бўлмаяпти. Шерзод Насруллаевга ҳакам “Сен тегмадинг, лекин ёнида хавфли югурдинг”, дебди. Агар футболчига тегмаган бўлса, контакт бўлмаса, қандай қилиб пеналти белгилаш мумкин? Тўғриси, тушунмадим», деди мураббий.
Тожиевнинг бу баёноти ҳакамлик атрофидаги баҳсларни янада кучайтирди. Аммо икки клуб ўртасидаги зиддият шу билан тугамади.
