Ўзбекистонлик боксчилардан бири жаҳон чемпионатида камида кумуш медални нақд қилди.
Сербия пойтахти Белград мезбонлик қилаётган бокс бўйича жаҳон чемпионатида ҳал қилувчи учрашувлар ўтказилмоқда. 4 ноябрь кунидан боксчилар финал йўлланмаси учун жангларни бошлаган.
Яримфиналга қадар етиб келган ўзбекистонлик икки нафар боксчидан бири Абдумалик Ҳалоков (-60 кг) финал йўлланмаси учун эронлик Даниял Шоҳбахшга қарши рингга чиқиши керак эди. Аммо ўзбекистонлик боксчи жанг қилмасдан финал йўлланмасини қўлга киритди. Сабаби эронлик чармқўлқоп устаси жароҳати туфайли ушбу жангда иштирок эта олмаган.
Шу тариқа, Абдумалик Ҳалоков 6 ноябрь куни олтин медаль учун финалда Франция ва Доминикан Республикаси вакиллари ўртасидаги жанг ғолибига қарши рингга кўтарилади.
Эслатиб ўтамиз, Абдумалик Ҳалоков аввалги босқичларда македониялик Жасин Ляма, словениялик Тадей Чернога ва россиялик Всеволод Шумков устидан ғалаба қозонганди.
Маълумот учун, Ўзбекистон бокс жамоаси Сербияга 13 боксчи билан борганди. Лекин Ҳасанбой Дўсматов, Шоҳжаҳон Абдуллаев, Миразизбек Мирзахалилов ва Шаҳрам Ғиёсов илк босқичдаёқ турнирни тарк этди. Одилжон Аслонов, Асадхўжа Мўйдинхўжаев ва Шаҳобиддин Зоиров 1/8 финалда юришини тўхтатди, Нодиржон Мирзаҳмедов, Саиджамшид Жаъфаров, Лазизбек Муллажонов ва Мужибилло Турсунов чорак финалдан ўта олмади.
Ўзбекистоннинг яримфиналга чиққан яна бир вакили Мадияр Саидраҳимов (-92 кг) бугун тўрт карра жаҳон чемпиони ва икки карра Олимпия ўйинлари ғолиби бўлган кубалик Хулио Ла Крузга қарши финал учун жанг қилади. Ушбу баҳс 5 ноябрга ўтар кечаси соат 00:30дан сўнг бошланади.
