АҚШнинг Висконсин штати, Уокешо шаҳрида рождество паради вақтида машина одамлар устига юриши оқибатида беш киши ҳалок бўлди, ўнлаб кишилар жароҳатланди.
Reuters’нинг ёзишича, гумонланувчи қўлга олинган, унинг машинаси ҳам топилган. Воқеа содир бўлган кўча атрофидаги муассасалар ёпиб қўйилган. Ҳолат бўйича суриштирув олиб борилмоқда.
Америка нашрлари полициядаги манбаларига асосланган ҳолда йўлтанламас рулида Милуокида яшовчи 39 ёшли кичик Даррел Эдвард Брукс бўлганини хабар қилган. Полиция BBC’нинг бу маълумот юзасидан аниқлик киритишни сўраб йўллаган сўровига жавоб бермаган.
Milwaukee Journal Sentinel газетасининг ёзишича, Брукс атиги икки кун олдин гаров эвазига ҳибсдан озод қилинганди - у зўравонлик ва калтаклаш ҳолати учун қамоққа олинган бўлган.
Фожиа якшанба куни, маҳаллий вақт билан соат 16:30да Уокешода рўй берганди. Автомобиль тўсиқни бузиб ўтган ва орасида кўплаб болалар ҳам бўлган одамлар устига юрган.
Полиция зобитлари ҳайдовчини тўхтатишга уринган ва автомобилга қарата ўқ узишган. Аммо у рулни парад иштирокчилари томон бурган, улар мактаб оркестрини кузатишаётганди.
Полиция бу ҳодисани теракт деб ҳисобламаяпти. Текширувлар жараёнидан хабардор бўлган Америка ҳуқуқ-тартибот органлари вакиллари CBS телеканалига гумонланувчи катта эҳтимол билан бошқа бир ҳодиса жойидан - пичоқбозлик рўй берган жойдан қочаётган бўлган.
Жабрланувчилар орасида мактаб оркестри аъзолари ва раққослар гуруҳи вакиллари бор.
Гувоҳлардан бири тўсиқлардан ўтиб келаётган йўлтанламасни кўргани, кейин ҳайдовчи парад иштирокчилари ўтаётган йўлга бурилганини айтган. «Биз уйлар орасида тургандик ва ҳайдовчи педални охиригача босиб, катта тезликда парад маршрути бўйлаб ҳаракатланганини кўрдик. Кейин баланд овоз ва машина уриб кетган одамларнинг қичқириқлари эшитилди», дейди Milwaukee Journal Sentinel нашрига шаҳар кенгаши аъзоси Анжелито Тенорио.
«Мен одамлар ўз фарзанди исмини айтиб бақираётганини эшитдим», дейди CNN мухбирига берган интервьюсида парад ўтказилган жой яқинида яшовчи гувоҳлардан бири.
