Қозоғистон «омикрон» сабабли бир қанча давлатлардан киришни чеклайди

Қозоғистон ҳукумати мамлакатда коронавируснинг «омикрон» штамми тарқалишининг олдини олиш мақсадида бир қатор давлатлардан хорижликларнинг киришини чеклашга қарор қилди. Бу ҳақда сешанба куни ҳукумат йиғилишида республика соғлиқни сақлаш вазирининг биринчи ўринбосари Марат Шоранов маълум қилди.

«Омикрон» янги штаммининг пайдо бўлганлигини ҳисобга олиб, идоралараро комиссия 3 декабрдан чеклов чораларини жорий этиш тўғрисида қарор қабул қилди», деди у.

Унинг сўзларига кўра, улар Ботсвана, Намибия, Лесото, Зимбабве, Мозамбик, Мадагаскар, Танзания ва бошқа давлатлардан бўлган хорижий фуқароларнинг Қозоғистонга киришига чеклов чорасини ўз ичига олади. 

Шунингдек, «омикрон» штамми аниқланган давлатлардан келганлар учун ПЗР тестини тақдим этиш бўйича мажбурий талаб жорий этилмоқда. Бундан ташқари, юқоридаги мамлакатлардан келганлар ўзларини яккалашлари керак. Қозоғистон ҳукумати Миср билан ҳам авиақатновларни тўхтатишга қарор қилди.

Қозоғистоннинг ўзида коронавирус инфекциясининг «омикрон» штамми ҳозирча аниқланмади.