Сўнгги вақтларда савияси ҳаминқадар бизнес-тренерлар бу соҳа обрўсига путур етказгани бор гап. Бироқ бу профессионал бизнес-консултантларга нисбатан талабни камайтиргани йўқ. Ана шундай тренерлардан бири, курсларининг нархи бир неча ўн миллион турадиган Иброҳим Гулямов – “Бизнес-класс” лойиҳасининг навбатдаги қаҳрамони.
"Perfect Consulting Group” компанияси 2016 йил май ойида бизнес-консултант, амалиётчи, маркетолог, реклама ва савдо бўйича мутахассис Гулямов Иброҳим Илҳомович томонидан ташкил этилган.
Иброҳим Гулямов сотув ҳажмини ошириш, мижозлар билан ишлаш ва рекламадан унумли фойдаланиш йўналишларида шахсий брендини ярата олган.
Интервю ва коучингда иштирок этган тадбиркорлар билан суҳбат жараёнигача шахсан ўзимда ҳам бу каби касб эгаларининг фаолиятига ишончсизлик бор эди. Реал ҳикояларни, компанияларнинг кўрган натижаси ҳақида хабардор бўлиб, муносабатим ўзгарди. Ҳар бир ишнинг илми бўлгани каби, фойдали бизнес қилишнинг ҳам маълум доирада ўз илми борлиги мавзуга ичкарироқ назар ташлаганда ойдинлашиб борди.
Суҳбатимиз аввалида Иброҳим Гулямовдан консалтинг фирмага асос солган пайти ҳақида сўрадик.
“Дўстимнинг корхонасида ишлаб юрган вақтимда бизнесни ўстириш, ривожлантириш ҳақида ўқиб-ўрганардим. Амалда қўллаб синаб борардик. Секин-секин ижобий натижа бера бошлаганини сезгач, бошқа компанияларга тавсиялар улашдик. Кейин бу йўналишни алоҳида бизнесга айлантириш ғояси келди.
Энг биринчи мижозларимизнинг бизнесини ўстиришга жуда кўп ҳаракат қилганмиз, лекин фойда кам бўлган. Кейин-кейин ҳаракатлар бироз камайиб, натижавийлик ўсиб бораверди. Бугунги кунга келиб, тахминан 3 минг нафар тадбиркор бизнес коучингларимизда, умумий ҳисобда 50 мингга яқин киши барча тренинг-маърузаларимизда иштирок этди”, – дейди у.
Биз кўрсатувни суратга олиш учун PCG бош офисида ҳам бўлдик. Жами 60тача ходим ишлайдиган компанияда сотув бўлими, дизайнерлар, маркетологлар ва ҳисобчилар фаолият юритади. Эътиборимизни тортгани шу бўлдики, сотув бўлимида мижозлар билан мулоқот олиб борувчи мутахассислар иш столида кўзгу бўлиб, ўз кайфиятини суҳбатлашиш жараёнида кўриб, табассум билан хушмуомала бўлишга уринар экан.
Иброҳим Гулямовнинг эса шахсий хонаси йўқлиги бизни ҳайрон қолдирди. Сабабини қуйидагича изоҳлашди: “Компания раҳбарларининг ишхонада алоҳида офиси бўлиши керак эмас. У ўзини кундалик муаммоларни ҳал қилишдан озод қилиши ва асосий эътиборини ривожланишга, янги стратегиялар тузишга сарфлаши лозим”.
Биз Иброҳим Гулямовнинг тренинглари ҳақиқатда натижа берган-бермаганига қизиқиб, унинг курсларида қатнашган уч нафар бизнесмен билан ҳам суҳбатлашдик. Улар яқин ўтмишдаги воқеаларни мароқ билан сўзлаб беришди.
Сартарошликдан бизнесменликка
“Brohouse” эркаклар салони таъсисчиси Акмал Аҳрорхўжаев:
— 20 йилдан бери сартарошлик қилиб келаман. Оддий ишчилар оиласидан чиққанмиз. Бизнесменлар авлоди эмасман. Тақдир экан, бир йили оёғим шикастланиб уйда ётиб қолдим. Ўша вақтларда Иброҳим Гулямов видеоларини интернетдан кўриб мотивация олгандим. Нега мен тадбиркор бўла олмайман деб савол бергандим ўзимга.
Аллоҳ шифо берди ва мен ҳам бизнес-коучингда иштирок этиш учун келдим. Ишонсангиз, биринчи дарсдан кейин ухлай олмаганман. Ўзимга сиғмай кетдим. Ўз бизнесимни бошлашга отландим. Йигирма йил юриб, атиги икки ой коучинг дастурда ўқиган вақтим шу салонни очдим. Аввало Аллоҳ насиб қилди, сабабчиси – устозимиз Иброҳим Гулямов бўлди деб биламан.
“Комфорт-зонага тушиб қолгандик...”
Revent архитектура компанияси асосчилари Фаррух Ҳакимов ва Абдуллоҳ Абдусаломов:
— Коучинггача ҳам бизнесда 10 йиллик тажрибамиз бор эди. Иш юриб турибди, етарлича вақт ва даромад ҳам бўларди. Комфорт-зонага тушиб қолгандик. Ҳатто студияга бориб қўшиқ куйлаб ҳам кўрдик. 1-2 дарсларда ўқиганимиздан кейин эса мия “портлади”. Кенгайиш ҳаракатига тушиб қолдик.
Янги филиални ўша ўқув вақтида очдик, устозларни, бошқа иштирокчиларни, эски йўқолиб кетган мижозларимизни ҳам таклиф қилдик. Ўша куннинг ўзида буюртма тушди. Ваҳоланки, у куни биз сотув қилмаётгандик. Ҳозир ходимларимиз сони уч баробар ошган. Бу каттароқ ва кўпроқ лойиҳалар билан ишлаш имконини беради.
“Минг долларни мақсад қилиб, 10 минг долларга чиқдим”
“Новза эшиклари” бренди асосчиси Сиддиқ Умаров:
— Охирги пулимни коучинг дарслари учун тўлашга роса ўйланганман. Дўстларимга айтганимда “жиннимисан?!” деб танқид қилишган. Истиҳора намозини ўқидим. Аллоҳдан хайрли қилишини сўраб дуо қилдим. Ва дарсга боришга қарор қилдим.
Асли 2016 йилдан бери эшик ясаб, етказиб бериш билан шуғулланар эдик. Лекин ривожланиб кетмаган. Фойдамиз дилерларнинг қарзида қолиб кетарди. Дарс бошида “А” ва “Б” нуқталарни белгилашимизни, ҳозир қанча даромад ва кутилаётган ўзгаришни киритишимизни сўрашди. Мақсаднинг кичиклигини қаранг, ойлик даромадга 1000 доллар ёзган эканман. Ҳали икки ойлик дарслар тугамасдан “Б” нуқта кўринмай кетди. Аввалига 5000, ҳозир эса ойлик 10 000 долларлик даромадга кўтарилдик, алҳамдулиллаҳ.
***
“Жамоага мақсади бир инсонларни тўплаш керак”
PSG вакилларининг айтишича, компаниянинг мақсади – тадбиркорларнинг бизнесини янги босқичга кўтариш ва шу орқали одамлар турмушини яхшилаш. Компаниянинг фаолият йўналишлари ҳақида билиб олгач, Иброҳим Гулямовдан ўзининг бу ҳаётдаги олий мақсади ва ёш тадбиркорларга тавсиялари ҳақида сўрадик.
“Олий мақсадим – Аллоҳнинг дийдорига етиш, Уни рози қилиш. Қолган барча амал-ҳаракатларимни шу йўлга тўғрилайман. Жамоага ёрдамчилар олаётганда ҳам мақсадлари бир манзилга элтадиган кишиларни кемага таклиф қиламиз. Шунда кучлар бир ниятда бирлашади. Бошқа томонга сузаман деган низолар юзага келмайди.
Бизнесга кирмоқчи бўлган ёшларда бир камчилик кузатилиб туради. Улар биттада ва тез муваффақиятга эришишни хоҳлашади. Илм ўрганиб, тажриба ва кўникма эвазига юқори поғоналарга кўтарилиш мумкин.
Замон билан ҳамнафас бўлиш керак. Сўнгги технологияларни тадбиркорликка жорий қилиб боришни маслаҳат бераман. Ишга ёллашда фақат қариндошларгагина номзод сифатида қараш – бизнинг ҳудудларда учраб турадиган муаммолардан. Муносиб ходимни, илмли ва тажрибали кадрларни ишга олиш ривожланиш эҳтимолини оширади”, дейди у.
“Ҳар қанча катта моддий таклиф бўлса ҳам, инсонга зарар келтириши мумкин бўлган спиртли ичимликлар ва тамаки савдоси, кредит билан шуғулланадиган соҳаларга маслаҳат ҳам бермаймиз, ўзимиз шуғулланмаймиз ҳам”, дея қўшимча қилди суҳбатдошимиз.
***
Бизнесда илмнинг ўрни, фойда олиш, сармояни тўғри ишлатиш ҳақида тасаввур ҳосил қилмоқчи ёки тадбиркорликка илк қадамни қўйиш арафасида бўлсангиз, кўрсатувни албатта кўринг. Бунинг учун яна бошқа рағбат ҳам бор.
“Perfect Consulting Group” компанияси “Бизнес-класс” томошабинлари учун махсус ютуқлар таклиф этади. Иброҳим Гулямовнинг 15-бизнес коучинги учун 7 миллион сўмлик ваучерлар тақдим этилмоқда. Биринчи мурожаат қилган 5та талабгоргина фойдалана олади, холос. Шошилинг, чегирмани қўлга киритиш учун промокод – “бизнескласс”.
Бундан ташқари, YouTube'даги видео остига қолдирилган энг қизиқарли 5та изоҳ муаллифига йирик сармоячи, миллиардер Уоррен Баффет қаламига мансуб китоб ҳадя этилади. Ғолиблар икки ҳафтадан сўнг YouTube'да ёзилган ўша фикр остига расмий каналимиз томонидан ёзилган билдириш орқали эълон қилинади.
Муаллиф – Элдор Воҳидов.
Тасвирчи ва монтаж устаси – Муҳаммаджон Ғаниев.
