«Twitter блокланган юртда Сенат раиси ҳар куни твит ёзади» — Сенатдан ижтимоий тармоқ блокланиши бўйича изоҳ сўралди

Жорий йилнинг 17 декабр куни АОКА мажлислар залида Сенатнинг йигирма иккинчи ялпи мажлиси якунлари юзасидан матбуот анжумани ўтказилди.

Kun.uz мухбирига кўра, тадбир давомида Ўзбекистонда ижтимоий тармоқларнинг суд қарорисиз блоклангани, Сенат раиси Танзила Норбоева эса ана шу ижтимоий тармоқдан қандай қилиб фаол фойдаланаётгани юзасидан изоҳ сўралди.

«Яқинда ижтимоий тармоқлар блокланиши бўйича рўй берган ҳолат кўплаб муҳокамаларга сабаб бўлди. Сенат 2021 йил январ ойида қабул қилган «Шахсга доир маълумотлар тўғрисида»ги қонунга киритилган ўзгаришлар ҳам муҳокама қилинди.

Мен бир нарсани яна урғу бериб айтмоқчиман, бу ерда ижтимоий тармоқлар блокланиши бўйича ҳеч қандай гап-сўз йўқ.

Сиз ҳозир Сенат раисининг қандай VPN’дан фойдаланиши бўйича савол беряпсиз. Бу бўйича менда аниқ маълумот йўқ. Биз буни ўрганиб, яна қўшимча ахборот берамиз. Бу ерда хорижий делегация, парламентлар билан ишлаш учун имконият масаласи ҳам бўлиши мумкин», – деди сенатор Фарҳод Боқиев.