Туркия Суперлигаси. 6-тур
«Истанбул Бошоқшеҳир» – «Генчлербирлиги» 4:0
Голлар: Олсен 9, Шомуродов 33, 65, Зелке 53 пеналти
«Истанбул Б»: Муҳаммад, Карбовник, Эмин, Ба, Саба, Умут, Кемен (Эргун, 62), Олсен, Брнич (Файзуллаев, 77), Зелке (Йилдирим, 69), Шомуродов (Ўзжан, 77).
Туркия Суперлигаси 6-турида «Бошоқшеҳир» ўз майдонида «Генчлербирлиги»ни қабул қилиб, йирик ҳисобда ғалабага эришди – 4:0.
Мезбонлар ўйин стартидаёқ ҳисобни очишди, тўп қанотдан жарима майдонига етказиб берилганида унга Элдор Шомуродов ета олмади, аммо Олсен қулай позицияда туриб дарвоза тўрини ишғол этди.
Бўлим ўрталаридан ўтганида ўзбекистонлик ҳужумчи рақиб жарима майдони марказида идеал тарзда очилди ва ҳимоячилар орасидан ўтказиб берилган тўпни дарвозага орқа турган ҳолда қабул қилиб олди ва тўпга иккинчи тегинишида аниқ зарба берди – 2:0.
Иккинчи бўлим бошида Шомуродов қанотдан тўп оширган вақтда истанбулликларнинг бошқа бир ҳужумчиси, германиялик Дэви Зелке пеналти ишлади ва ўзи уни аниқ ижро этди.
65-дақиқада Шомуродов дублни расмийлаштирди ва ўйиндаги якуний ҳисобни ўрнатди – 2:0.
77-дақиқада 31 ёшли ҳужумчи захирага олинди, Ўзбекистон миллий жамоасининг бошқа бир вакили Аббосбек Файзуллаев эса шу вақтда ўйинга қўшилди.
Ушбу ғалабадан кейин «Бошоқшеҳир» очколари сонини 7 тага етказди ва турнир жадвалида 12-ўринга кўтарилди.
Қайд этиш керакки, Шомуродов шу куни жорий мавсумдаги голлари сонини 6 тага етказиб олди ва айни вақтда «Галатасарой» ҳужумчиси Виктор Осимҳен ҳамда «Амедспор» аъзоси Гифт Орбан билан бир хил натижа қайд этиб, тўпурарлар рўйхатида 2-ўринни бўлишиб турибди. Рўйхатга эса ёзги трансферлар ойнасида «Трабзонспор»га келиб қўшилган мисрлик ҳужумчи Муҳаммад Салоҳ бошчилик қилмоқда – у шу турда «Галатасарой»га қарши ўйинда (4:0) ҳет-трик қайд этди ва голлари сонини 7 тага етказиб олди.
Маълумот учун, Шомуродов Туркия суперлигасининг ўтган мавсумида 22 гол уриб, «Трабзонспор» ҳужумчиси Виктор Онуачу билан бир хил кўрсаткич қайд этган ҳолда энг яхши тўпурар бўлганди.
