Ҳокимлик мансабдорларига Жиноят кодексининг 205-моддаси (Ҳокимият ёки мансаб ваколатини суиистеъмол қилиш) билан жиноят иши қўзғатилган.
Жиззах вилояти ҳокимлиги ахборот хизматининг хабар беришича, вилоят прокуратураси томонидан мавжуд сунъий балиқчилик ҳавзаларида президентнинг 2022 йил 13 январдаги “Балиқчилик тармоғини янада ривожлантиришнинг қўшимча чора-тадбирлари тўғрисида” ги қарори ижроси юзасидан ўтказилган текшириш ишлари олиб борилган.
Текшириш жараёнида аниқланишича, Зарбдор туман ҳокимининг тегишли қарори билан Ч.Н. раҳбарлигидаги “М.П.” хусусий корхонасига балиқчиликни ривожлантириш мақсадида сунъий ҳавза яратиш учун жами 20 гектар сувли ер ижарага ажратилган.
Туман ҳокимлиги масъул мансабдор шахслари томонидан мониторинг ишлари ўтказилмагани оқибатида “М.П.” хусусий корхона раҳбари Ч.Н. ўзига ажратилган ердан ташқари қишлоқ хўжалиги маҳсулотлари етиштириш учун мўлжалланган 48 балл бонитетига эга бўлган жами 9 гектар ер майдонини ноқонуний эгаллаб, давлат ва жамият манфаатларига 4 миллиард 400 миллион сўм зарар етказган.
Айни пайтда, мазкур ҳолат юзасидан Зарбдор туман ҳокимлиги масъул мансабдор шахсларига нисбатан Жиноят кодексининг 205-моддаси (Ҳокимият ёки мансаб ваколатини суиистеъмол қилиш) ҳамда “М.П.” хусусий корхона раҳбари Ч.Н.га нисбатан 192-11-моддаси (Нодавлат тижорат ташкилотида ёки бошқа нодавлат ташкилотида мансабдор шахслар томонидан ўз ваколатларини суиистеъмол қилиш) бўйича жиноят иши қўзғатилиб, тергов ҳаракатлари олиб борилмоқда.
