Йирик халқаро компанияда эътибор қозониш учун нима қилиш керак? Албатта, ҳар куни ўз касбий маҳоратингизни кўрсатиб, аъло даражада ишлаш. Лекин бир жойда тўхтаб қолмаслик, доимо ривожланиш ҳам бир хил даражада муҳимдир. Бу Beeline Uzbekistan’нинг эксперт-юрисконсульти Сардор Бахрамовнинг табиатига мос келади. Қисқа вақт ичида у нафақат ўзи учун мутлақо янги соҳага кўникди, балки Beeline жамоасининг энг қадрли аъзоларидан бирига айланди. Бунинг учун у компаниянинг 15 йиллиги шарафига олтин нишон билан тақдирланди.
Қулайлик доираси қаерда жойлашган?
“Мен аввал бошқа жойда ишлаганман ва ҳеч нарсани ўзгартиришни хоҳламасдим” – Beeline Uzbekistan’нинг кўплаб ходимларининг ҳикоялари компанияга келган вақтларини эслаш билан бошланади. Лекин буни тушунтириш осон: таниш муҳит, одамларни тарк этишлари осон бўлмаган “қулайлик доираси” ... Тўғри, охирида маълум бўлишича, ўша жойда унчалик ҳам қулайлик бўлмаган. Сардор Бахрамов эслашича, Тошкент шаҳри туманларидан бирида адвокат бўлиб ишлаган чоғида дам олиш кунлари ва оддий иш вақти нима эканлигини билмас эди. Шунга қарамай, унинг Beeline Uzbekistan’га ўтиши тасодифан содир бўлган. Хусусий компаниялар юристларга қандай шарт-шароитларни таклиф қилишлари унда қизиқиш уйғотган. Шундай қилиб, Сардор ўз резюмесини Headhunter’да жойлаштирган – ва тез орада уни интервьюга таклиф қилишган.
“Мен HR-дирекциясида Татьяна Григорьева билан суҳбатдан ўтдим, – дейди Бахрамов. – Шу суҳбатнинг ўзидан мен шу компанияда ишламоқчилигимни тушуниб етдим, чунки бу ерда ҳар бир ходим қадрланади, бу ерда ажойиб жамоа бор. Ниҳоят, улар нормал кун тартибини таклиф қилишди, мен учун бу янги нарса эди. Бу мени қизиқтирди, энди мана икки ярим йилдирки, шу ердаман. Beeline’га келишим билан, жуда тез орада ўзимга савол бердим: нега мен ўн йил олдин бу қадамни қўймадим, нега тунлари билан ишлаб чиқдим?! Айтганча, ишимни ўзгартирганимдан кейингина мен ниҳоят уйландим. Бунгача оилавий ҳаёт ҳақида ўйлашга ҳам вақт йўқ эди”.
Жамоа қандай кутиб олади?
Beeline Uzbekistan'га ўтиш тасодифми ёки тақдирми? Катта эҳтимол билан иккинчиси, чунки Сардор компания жамоасига осон ва тез қўшила олди. Ҳамкасблар бунга ҳар томонлама ҳисса қўшдилар: ишининг иккинчи кунидаёқ янги етакчи юрисконсульт илк топшириқларини олди. Техник бўлим вакили Владислав Вокал БС, АМС нима эканини, 3G ва 4G тармоқлари ўртасидаги фарқ қандайлигини батафсил айтиб берди. Шу пайтдан бошлаб «қўрқинчли» профессионал атамалар тушунарли ва таниш бўлиб қолди. Аслида, ҳаммаси оддий: БС - бу таянч станцияси, АМС - антенна-мачта конструкцияси, алоқачилар ускуналарни ўрнатадиган минора, шунда телекоммуникация хизматлари кенгроқ ҳудудга тарқалади. Нега юрист буларнинг барчаси ҳақида билиши керак? Чунки рухсат олиш, алоқа воситаларини қонуний рўйхатдан ўтказиш унинг вазифаларига киради. Учинчи авлод частоталари учун эса 4G частоталарига қараганда бироз бошқача ҳужжатлар талаб қилинади. Умуман олганда, телеком компаниясида ишлаганда, ҳамма жойда касбга оид сўзлар эшитилади: йўлакларда, йиғилишларда, ҳатто корпоратив байрамларда ҳам. Сардор атрофлича «ликбез»дан сўнг гап нимада эканини тушуниб етди. Ҳозирда шунчалик кўп билим тўпланганки, ҳамкасбларнинг фикрича, собиқ адвокат техник бўлимда ҳам бемалол ишлашга қодир. Ҳеч бўлмаганда у ўзини алоқачи деб ҳисоблашга тўлақонли ҳақли.
