2 ноябр куни кечқурун Киев яқинидаги Петропавловская Боршчаговка қишлоғидаги хусусий уй атрофида ўнлаб одам тўпланди. Бунга кун давомида ижтимоий тармоқларда ушбу уй ертўласида қуролли шахслар 40 га яқин кишини ушлаб тургани ҳақида тарқатилган хабар сабаб бўлди.
Йиғилганларнинг сўзларига кўра, ушбу уйда ҳарбий қисмни ўзбошимчалик билан тарк этган ҳарбийлар ушлаб турилган ва калтакланган. Намойишга келган аёллардан бири журналистларга ичкарида ўғли ҳам борлигини, у ишга кетаётганда ҳарбий комиссариат ходимлари томонидан қўлга олинганини айтди. Аҳоли ичкарига бостириб киришга ва дарвозани бузишга уринган.
Кўп ўтмай уйга полициячилар ҳам етиб келган. Уларни воқеа жойида бўлиб турган тез ёрдам ходимлари чақиришган. Шифокорлар тиббий ёрдамга муҳтож бўлган одамлар олдига ўтказишмаётганини билдиришган.
Полициядагилар уйда одамлар ноқонуний тарзда ушлаб турилгани ҳақидаги хабарларни ёлғон деб атади ва бу ерда Украина Миллий гвардияси бўлинмаларидан бирининг ҳарбий хизматчилари жойлашганини билдирди.
Миллий гвардия қўмондони Олександр Пивненко воқеа жойига келди ва бу маълумотни тасдиқлади. Унинг сўзларига кўра, Миллий гвардия хусусий уйни ижарага олган ва ундан вақтинча жойлашув пункти сифатида фойдаланган, сафарбар қилинган янги аскарлар ҳам шу ерга олиб келинган ва шу ерда расмийлаштириш ишлари ўтказилиб, кейин ўқитишга юборилган.
Пивненко келишидан олдин уйдан тўрт киши олиб чиқилган ва улар тиббиёт ходимларига топширилган. Журналистлар хабар беришича, улардан бирининг умуртқа поғонаси синган. Миллий гвардия қўмондони уйдан олиб чиқилиб, шифохонага олиб кетилган тўрт киши – Миллий гвардиянинг ҳарбий қисмларини ташлаб кетганидан кейин қўлга олинган ҳарбийлари эканини маълум қилди. У уйда яна 18 нафар ҳарбий борлиги ва уларнинг «аҳволи жойида экани»ни айтган.
