Ўзбекистонда рўйхатдан ўтган компания АҚШ санкцияларига учради. Компания Россияга ҳарбий ёрдам беришда айбланган

АҚШ Давлат департаменти санкцияларни бузгани учун Ўзбекистондаги Promcomplektlogistic компаниясига қарши чекловлар жорий қилди. Ушбу компания Россияга электрон қисмлар, хусусан микросхемалар етказиб берган.

Фото: Reuters

АҚШ Савдо вазирлиги тўққиз мамлакатнинг 36 компаниясини Россия ҳарбий ва мудофаа саноатини қўллаб-қувватлагани учун санкциялар рўйхатига киритди.

«Қора рўйхат»дан Хитойнинг 25 компанияси, шунингдек, Россия, БАА, Литва, Покистон, Сингапур, Буюк Британия, Вьетнам ва Ўзбекистонда жойлашган компаниялар ҳам ўрин олган.

Санкциялар рўйхатига тушган Ўзбекистондаги компаниянинг номи Promcomplektlogistic бўлиб, Тошкент шаҳрида хусусий корхона сифатида рўйхатдан ўтган. Очиқ маълумотларга кўра, корхонанинг 100 фоиз улуши Олег Грабилинга тегишли ҳисобланади.

АҚШ Давлат департаментига кўра, Promcomplektlogistic жорий йилнинг 3 март куни санкцияга учраган ва Россия мудофаа саноати таъминотчиси бўлган «Радиоавтоматика» компанияси билан ҳамкорлик қилади.

Қайд этилишича, Promcomplektlogistic «Радиоавтоматика»га қарши қўлланган санкцияларни четлаб ўтган ҳолда, Россияга электроник қисмлар, хусусан микросхемалар етказиб берган.

АҚШ Савдо вазирлиги хулосасига кўра, «қора рўйхат»га тушган компаниялар санкциялар остида қолган Россия ташкилотлари билан товарлар етказиб бериш бўйича шартномалар тузишда давом этмоқда.