Евгений Пригожин вафот этганидан кейин Россия ҳукумати «Вагнер» хусусий ҳарбий компаниясини ўз назоратига олиб, РФ мудофаа вазирлиги таркибида «Африка корпуси»ни ташкил этган, компаниянинг Африка минтақасидаги ёлланма жангчилари ушбу корпус таркибига ўтказилиши кўзда тутилганди. Аммо The Wall Street Journal нашри ёзишича, Пригожиннинг ўғли Павел Марказий Африка Республикасидаги (МАР) вагнерчилар устидан назоратни сақлаб қолган ва отасининг бизнесини кенгайтириш билан шуғулланмоқда.
Нашр маълумотига кўра, бунда унга МАР президенти Фостен-Арканж Туадер ёрдам берган, у Кремлдан вагнерчилар ўрнига РФ мудофаа вазирлиги ҳарбийларини олиб келмасликни сўраган ҳамда Пригожиннинг ёлланма жангчиларини ўз мамлакати полицияси, армияси ва разведка бўлинмаларига интеграция қилган.
Айни вақтда мамлакат пойтахти Банги шаҳрида 500 нафар атрофида вагнерчи жойлаштирилган. Улар президентни қўриқлашмоқда, исёнчиларга қарши кураш олиб боришмоқда ҳамда олтин қазиб олиш, гиёҳванд моддалар ва қуроллар савдосидан даромад олмоқда, деб ёзади WSJ.
Кичик Пригожин Марказий Африкадаги йилига 250 миллион доллар даромад келтирадиган энг йирик олтин конини назорат қилади. Маҳаллий ҳукумат эса қазиб олинган қимматбаҳо металлни давлат мулки сифатида белгилаб, уни чет элга олиб чиқишга ёрдам беради. Журналистлар қайд этишича, сўнгги уч ой давомида олтинни олиб чиқиш Беларус орқали амалга оширилган.
Бундан ташқари, Пригожин маҳаллий трамадол бозорининг катта қисмини назорат қилади ҳамда Судан ва Ливиядаги исёнчи гуруҳларга қурол сотади. Вагнерчилар МАРда ароқ ва пиво ишлаб чиқаришни ҳам йўлга қўйишган.
Пригожинлар оиласи йилига жами 400 миллион доллардан ортиқ даромад олади, деб ҳисоблайди «Трансмиллий уюшган жиноятчиликка қарши кураш бўйича глобал ташаббус» ташкилоти.
WSJ журналистлари суҳбатлашган экспертлар фикрича, кичик Пригожин Марказий Африка Республикасидаги мавқейини мустаҳкамлаш учун Кремл билан ўзига хос келишув тузган. Нашрнинг таъкидлашича, Марказий Африка Республикасида гуруҳга тегишли радиостанциялар ҳам мавжуд бўлиб, улар орқали Ғарбга қарши тарғибот олиб борилади, президент Туадер улуғланади, Россия ҳукумати мадҳ этилади.
Павел Петербургда истиқомат қилади, аммо мунтазам равишда Бангига сафар қилади, деб ёзади WSJ. Шундай сафарлардан бирида у Ledger Plaza меҳмонхонасида тунаган, бу ер эса амалда вагнерчиларнинг Марказий Африка Республикасидаги штаб-квартирасига айланган. Меҳмонхона ҳудуди автомат кўтарган жангчилар томонидан қўриқланади, юқори мартабали мулозимлар ҳам Пригожин билан учрашувга киришидан олдин синчиклаб текширилади.
