Bloomberg агентлигининг манбага таяниб хабар беришича, Россияга қарши кескин санкциялар деб аталаётган қонун лойиҳаси АҚШ Конгрессининг қуйи палатаси — Вакиллар палатасида келаси ҳафта овозга қўйилади.
Қонун лойиҳаси муаллифи Жанубий Каролина штатидан сенатор Линдси Грэм бўлиб, у жорий йил июл ойида вафот этган. Август ойи бошида мазкур ташаббус АҚШ Сенатида ҳам қўллаб-қувватланган эди.
Bloomberg манбасига кўра, санкциялар пакети республикачилар партия съездидан қайтгач кўриб чиқилади. Қонун лойиҳасини Вакиллар палатасида қабул қилиш учун оддий кўпчилик овози етарли бўлади.
Ҳужжат маъқулланса, президент Доналд Трамп Россия нефти ва газини энг кўп харид қиладиган бешта давлатга, шунингдек, Москвага энергетика санкцияларини четлаб ўтишда ёрдам бераётган яна бешта мамлакатга нисбатан 100 фоизлик божлар жорий этиш имкониятига эга бўлади.
Айнан президент ваколатларининг кенгайиши аввалроқ Вакиллар палатасидаги демократларнинг эътирозига сабаб бўлган. Улар қонун лойиҳаси республикачи президент Доналд Трампга тариф сиёсати борасида ҳаддан ташқари кенг ваколат бериши мумкинлигидан хавотир билдирган.
Reuters маълумотига кўра, Вакиллар палатасининг Регламент қўмитаси санкциялар бўйича қонун лойиҳасини 14 сентябр, душанба куни куннинг иккинчи ярмида кўриб чиқишни режалаштирган. Қўмитада республикачилар кўпчиликни ташкил этади.
Агар қўмита ҳужжатни маъқулласа, шу ҳафтанинг ўзида қонун лойиҳаси Вакиллар палатасининг тўлиқ таркиби овозига қўйилади. У ерда ҳам етарли овоз тўпланса, ҳужжат имзолаш учун Доналд Трампга юборилади. АҚШ президенти аввалроқ ушбу ташаббусни қўллаб-қувватлашини билдирган.
Reuters манбасининг айтишича, АҚШ президенти маъмурияти янги санкциялар Трампга Хитой раҳбари Си Жинпингнинг АҚШга режалаштирилган ташрифи олдидан қўшимча босим воситаларини тақдим этишини ҳам таъкидлаган. Си Жинпингнинг АҚШга ташрифи 24 сентябрга режалаштирилган.
Сенатда 86 сенатор қўллаб-қувватлаган
Россияга қарши мазкур санкциялар лойиҳасини Сенат 28 июлда — Линдси Грэмнинг дафн маросими ўтказилган куни муҳокама қилишни бошлаган. Грэм бир йилдан ортиқ вақт давомида ушбу ташаббус Конгрессда қўллаб-қувватланишига эришишга ҳаракат қилган.
