«Барса» икки топ футболчи олди, Германияда Ҳоландга ўринбосар топилди. Ҳафтанинг асосий трансферлари

Якунланган ҳафта Европада трансферлар ойнаси расман очилгандан кейинги илк ҳафта бўлди. 1 июл куни трансферлар бозорида кўплаб эркин агентлар пайдо бўлди ва улар янги клуб топиши учун икки-уч кун етарли бўлди. Қуйида Европада ўтган ҳафтада амалга ошган асосий трансферлар.

Франк Кессье, «Милан» → «Барселона», эркин агент

Италия чемпиони «Барселона» билан тўрт йиллик шартнома имзолади. «Милан» ўзининг асосий яримҳимоячисини текинга қўйиб юборишга мажбур бўлди, уч йил муқаддам у «Аталанта»дан 32 млн евро эвазига харид қилинганди. 2021/2022 йилги мавсумда Кессье 39 ўйинда иштирок этди ва таянч яримҳимоячиси позициясида тўп суришига қарамай, етти гол уриб, бир голли узатмани амалга оширди. Бундан ташқари, ўтган мавсумда Франк уч ўйинга жамоани сардор сифатида бошлаб тушган.

«Мен учун бу ажойиб имконият. Мавсум бошланиши ва бор кучимни жамоа учун беришни сабрсизлик билан кутмоқдаман. Сени ўз вақтида ажойиб футболчи бўлган ва эндиликда ажойиб мураббий Хави жамоага чақирганда, барча ҳаракатларинг зое кетмаганини англайсан. У ва янги жамоадошларим билан имкон қадар тезроқ иш бошлашни истаяпман», – деди «Милан»нинг собиқ футболчиси янги клуби билан шартнома имзолагач.

Калвин Филлипс, «Лидс» → «Манчестер Сити», 48,75 млн евро

«Сити» Фернандиньо кетгач, таянч яримҳимоясида бўш қолган позицияга Филлипсни олиб келди. Англия терма жамоасига номзод бўлган 26 ёшли яримҳимоячи «шаҳарликлар» билан олти йиллик шартномага имзо чекди. 2021/2022 йилги мавсумда Филлипс фақат 23 ўйинда майдонга тушган, у мавсумнинг уч ойдан ортиқ қисмини тизза остидаги мушаклари жароҳати туфайли ўтказиб юборди.

«Бу жамоага қўшилишимнинг асосий сабаблари Гвардиола билан, ва албатта, юлдузли жамоа билан бирга ишлашни, шунингдек кўп нарсаларни ўрганиш ва ўз ўйинимда янада кўпроқ муваффақият қозонишни истаганим билан боғлиқ. Ўйлайманки, мен Хосев ва футболчилардан кўп нарса ўрганаман.

«Манчестер Сити» билан биринчи ўйинимни эслайман. Бу «Элланд Роуд»даги қайноқ оқшом бўлганди. Биз 1:1 ҳисобини қайд этгандик. Мен ҳамма билан қўл бериб кўришдим, лекин деярли гаплашмадим, чунки қаршимда катта юлдузлар турарди. Тилим лол эди. Кейин Хосеп ўзи олдимга келди ва қўлимни сиқди», дея эслайди футболчи.

Стивен Бергвайн, «Тоттенҳэм» → «Аякс», 31,25 млн евро

24 ёшли вингер Нидерландияга қайтди. 2021/2022 йилги мавсумда атиги саккиз ўйинда бошланғич таркибда тушган Бергвайн Нидерландиядаги собиқ жамоаси «ПСВ»нинг ашаддий рақиби ҳисобланган «Аякс» билан беш йиллик шартномага имзо чекди.

Аммо амстердамликлар клубида ҳам Стивен асосий таркиб учун курашиши керак – уни Нидерландия чемпионатида кўп йиллардан буён барқарор ўйин кўрсатиб келаётган Душан Тадичга қарши рақобат кутмоқда, сербиялик тажрибали футболчи ўтган мавсумда 34 ўйинда 13+19 кўринишидаги статистикани қайд этган.

Андреас Кристенсен, «Челси» → «Барселона», эркин агент

Кристенсен – «Челси» билан кўп совринлар қўлга киритди, фақат Англия чемпионлиги бундан мустасно. Бу ёзда «Барселона»нинг омади келди: каталонияликлар бир евро ҳам сарфламасдан иккита яхши трансфер амалга оширишди. Коронавирус, белдаги жароҳат ва товон тўқималаридаги муаммоларга қарамай, Кристенсен 2021/2022 йилги мавсумда 34 ўйинда майдонга тушган. Даниялик ҳимоячи «Барселона» билан тўрт йиллик шартнома имзолаган.

«Мен кундалик ишим орқали ўз ҳиссамни қўшишни ва атрофдагиларнинг барчасидан нимадир ўрганишни истайман. Ишонаманки, бу жамоа барча турнирларда ғалаба қозониш салоҳиятига эга жамоадир, доимо шундай бўлган. Ҳар бир футболчи ҳар ҳафта майдонга тушишни хоҳлайди. Жамоада рақобат бор ва бу мени янада кучли бўлишга ундайди. Мен рақобатчиларни номма-ном келтиришни истамайман, шунчаки айтаманки, «Барселона»нинг барча ҳимоячилари жуда кучли. Пике – афсона, ўйлайманки, ундан кўп нарса ўрганаман.

Хави мендан алоҳида бирор нарса сўрамади. Мен аввал қандай ўйнаганим туфайли шу ердаман. Ўйлайманки, жамоа ўйинига яхши киришиб кетаман, бирор нарсани ўзгартиришимга тўғри келмайди. Мен соппа-соғман ва ўйнаш имкониятини кутмоқдаман. Мен «Челси»да ўтган даврдан фахр туяман. Такрорлайман, мен мутлақо соғломман. Олдиндаги мавсумдан завқ олишни истайман. Таркибимизда ажойиб футболчилар жамланган, «Барселона»дан кучлироқ жамоалар кўп эмас. Жамоага ёрдам беришни истайман, чунки унда катта салоҳият бор», – деган Кристенсен.

Габриэл Жезус, «Манчестер Сити» → «Арсенал», 52,2 млн евро

Жезус 2016 йилда «Сити»га келган, тез орада Кун Агуэронинг ўрнини эгаллаши кўзда тутилганди. Якунда Кун кетганидан кейин ҳам бразилиялик форвард Пепни ўз имкониятларига ишонтира олмади. 2021-2022 йилги мавсумда Гвардиола марказий ҳужумчисиз ўйнашга ўтди, Жезус эса кўп ҳолларда захирадан ўйинга қўшилди. У ўтган мавсумда 41 ўйинда (барчасида ҳам бошланғич таркибда эмас) «гол+пас» тизимида 13+12 натижасини қайд этди. Энди Жезус беш йилга «Арсенал» футболчиси бўлади. «Канонир»лар сафида форвард кўпроқ ўйин амалиётига эга бўлиши тайин. 

Ҳужумда Жезус истиқболли Эдди Нкетиа билан биргаликда ҳаракатланади, бунгача жамоанинг асосий ҳужумчиси бўлган Александр Ляказетт «Лион»га қайтган. Габриэл клуб учун илк ўртоқлик ўйинида захирадан тушиб, дублга эришишга улгурди.

«Биз Артета билан клуб, футболчилар, «Арсенал» лойиҳаси ва истиқболлар ҳақида бир неча бор гаплашиб олдик. Мен Микелга тўлиқ ишонаман. У «Ман Сити»да ишлаганида у билан кўп яхши дамларни ўтказганман. У жуда яхши йигит ва яхши мураббий, у менга жуда кўп ёрдам берган. Биз ҳамиша машғулотлардан кейин қолиб, яна бирга ишлардик. У жуда ақлли инсон, яқин ўтмишда ажойиб футболчи бўлган, шундай экан, менга ва ёш футболчиларга кўп нарса ўргатиши мумкин.

Мен болалигимдан Тьерри Анри туфайли «Арсенал»нинг ўйинларини кузатганман. «Арсенал»да тўп сурган бошқа футболчилар ўйинини ҳам кўрганман ва шундай ўйлардим: «Вау, бу катта клуб!» Ва мен ушбу катта клуб билан шартнома имзолаганимдан жуда хурсандман. Мен «Арсенал»нинг қизиқиши ҳақида хабардор бўлган илк кунимданоқ бахтиёр эдим», деди футболчи трансфердан кейин.

Анхел ди Мария, «ПСЖ» → «Ювентус» Д, эркин агент

Трансферлар бозоридаги яна бир агентни ҳам «Барселона» ўзиники қилиши мумкин эди, аммо каталонияликлар лига талаблари туфайли аргентиналик юлдуз футболчига фақат йилига 2 млн евролик маош таклиф қила олишди, Туринда эса у уч баробардан кўпроқ ишлаши (7 млн евро) ва А Сериянинг энг юқори маош олувчи беш футболчисидан бири бўлиши мумкин.

Шундай экан, бу танловни мантиқли дейиш мумкин, ди Мария Испания чемпионатида «Реал» билан ғолиб бўлиб улгурган, қолаверса Мадридда тўп сурган футболчи Каталония пойтахтига келишининг ўзи унчалик мантиқий эмас. Ди Мария Федерико Кьеза ва Душан Влаҳович билан ҳужум учлигини ташкил қилиши мумкин. «Кекса синьора» марказига Пол Погба қайтиши кутилмоқда. Агар «Юве» «Наполи»дан Кулибалини бу сафар ололса ва «Рома»дан Никола Дзаньолони олиб келиш режаси ниҳоят амалга ошса, Массимилиано Аллегри қўл остида яна узоқ йиллар Италияда доминантлик қилиши мумкин бўлган таркиб йиғилади. Ди Марияга катта ишонч билдирилган, агар барча ўйланган ишлар амалга ошса, бир йилдан кейин 35 ёшга чиқадиган футболчига янги шартнома таклиф этилиши ҳам мумкин.

Себастьен Аллер, «Аякс» → «Боруссия» Д, 31 млн евро

Чемпионлар лигасида Криштиану Роналдунинг рекордини такрорлаган Аллер «Боруссия»да Эрлинг Ҳоланднинг ўрнини эгаллади. Француз форварди янги жамоаси билан тўрт йиллик шартнома имзолаган. Чемпионлар лигаси гуруҳ босқичидаги голлардан ташқари Себастьен Эредивизиянинг ўтган мавсумида 21 гол муаллифи бўлди. Дортмундликлар клубида Аллер тўққизинчи рақам остида ҳаракат қилади.

«Клубда ажойиб стадион бор, аммо энг яхши стадион — мухлисларсиз ҳеч нарсага арзимайди. Мен 80 мингдан ортиқ томошабин «Боруссия» оиласининг бир қисми сифатида қўллаб-қувватлаб туришини ҳис қилишни сабрсизлик билан кутмоқдаман. Умид қиламанки, яқин йилларда биз биргаликда катта муваффақиятларга эришамиз ва буни биргаликда  нишонлаймиз», – дея немислар клубига ўтгандаги ҳиссиётларини бўлишган ушбу форвард.

Луис Синистерра, «Фейеноорд» → «Лидс», 25 млн евро

Дарҳол айтиш керакки Синистерра Филлипсга ўринбосар сифатида олиб келинмади. 23 ёшли Луис чап вингер позициясида тўп суради, у таянч яримҳимоячиси эмас. «Фейеноорд»да ушбу колумбиялик ўтган мавсумда тўрт минг дақиқадан ортиқроқ майдонда бўлган ва 23 гол уриб, 14 ассист амалга оширган. Синистерра «Лидс» билан беш йиллик шартнома имзолади. Луис Конференциялар лигасининг энг яхши ёш футболчиси сифатида тан олинди, шунингдек турнир рамзий жамоасидан ўрин олди. Янги жамоасида Синистерра Дэниел Жеймс ва Жек Ҳаррисон билан рақобатлашади.

Бонус: Тайлер Адамс, «РБ Лейпциг» → «Лидс» Д, 17 млн евро

Яна бир америкалик АПЛга келди. Адамс Филлипснинг позициясида ўйнайди. 23 ёшли яримҳимоячи 2021/2022 йилги мавсумда 37 ўйинда иштирок этган, шундан 20 тасида бошланғич таркибда майдонга чиққан. АҚШ терма жамоасига Адамс 2017 йилдан буён аъзо ҳисобланади ва шу вақтгача 19 ўйин ўтказган.