Туронбанк IFC билан трансформация қилиш бўйича келишув имзолади

2022 йилнинг 10 август куни Туронбанк фаолиятини тўлиқ трансформация қилиш юзасидан Халқаро молия корпорацияси (IFC) билан навбатдаги келишув шартномаси имзоланди. 

Замонавий банк хизматларига бўлган талаб кундан кунга ошиб бораётган пайтда Ўзбекистон молия бозорида ўзининг муносиб рейтингига эга Туронбанк томонидан мижозлар учун қулай ва инновацион хизматларни таклиф этиш мақсадида замонавий трансформация жараёнлари амалга ошириляпти. Банк фаолиятида энг сўнгги технологияларни қўллаган ҳолда иш юритувини жорий этиш, осон, тезкор ва сифатли банк маҳсулотларини ишлаб чиқиш муҳим саналади. 

Шу мақсадда банк нуфузли халқаро молия ташкилотлари билан ҳам ижобий алоқаларни йўлга қўйган. 2021 йилдан бошлаб Жаҳон банки гуруҳига кирувчи Халқаро молия корпорацияси (IFC) билан ўрнатилган ҳамкорлик муносабатлари бунга мисол бўла олади. Унинг натижасида дастлабки босқичда Туронбанк фаолияти чуқур таҳлил қилинди. 

Ўзаро ҳамкорликнинг навбатдаги иккинчи босқичи эса 2022 йилдан бошланиб, унда IFC экспертлари томонидан банкнинг жорий операциялари, кредит жараёнлари, рискларни бошқариш, корпоратив бошқарув бўйича батафсил баҳолаш олиб борилди ҳамда молия муассасасининг бизнес жараёнлари диагностикадан тўлиқ ўтказилди. Натижада, хусусийлаштиришга тайёргарлик кўриш учун Халқаро молия корпорацияси (IFC) билан ҳамкорликда Туронбанкни 2022-2025 йиллар давомида тўлиқ трансформация қилиш бўйича “Йўл харитаси” ишлаб чиқилди.

Навбатдаги келишувда эса Халқаро молия корпорацияси (IFC) билан банк фаолиятини тўлиқ трансформация қилиш бўйича шартнома имзоланди. 

Тадбирда “Туронбанк” АТБ Бошқарув раиси Чори Мирзаев, IFC билан имзоланган мазкур ҳамкорлик келишуви давлатимиз раҳбарининг 2020 йил 12 майдаги “2020-2025 йилларга мўлжалланган Ўзбекистон Республикасининг банк тизимини ислоҳ қилиш стратегияси тўғрисида”ги Фармони ижроси юзасидан олиб борилаётган ишларнинг мантиқий давоми эканлигини қайд этди.  

Халқаро молия корпорациясининг (IFC) яқин Шарқ, Марказий Осиё, Туркия, Aфғонистон ва Покистон бўйича молия институтлари гуруҳи менежери Мехмет Мумджуоглунинг таъкидлашича, “Туронбанк” АТБ билан тузилган стратегик ҳамкорлик ҳукуматнинг иқтисодиётдаги улушини камайтириш бўйича амалга оширилаётган саъй – ҳаракатларнинг муҳим босқичларидан биридир. 

“Биз Туронбанк билан ўзаро ижобий алоқаларни йўлга қўйганлигимиздан мамнунмиз ва банкнинг кичик ўрта бизнес тармоғи, шунингдек сув хўжалиги каби йўналишлардаги фаолиятини юқори баҳолаймиз”,- дейди IFC менежери Мехмет Мумджуоглу.   

Қайд этилишича, Туронбанк ва Халқаро молия корпорацияси (IFC) ўртасидаги ҳамкорликнинг янги босқичга олиб чиқилиши банкни хусусийлаштириш жараёнларини янада тезлаштиришга хизмат қилади. Бу орқали эса мижозлар базасини ошириб, кўрсатилаётган хизматлар сифатини бир неча карра яхшилаш, бизнес вакиллари учун таклиф этиладиган маҳсулотларнинг турларини кўпайтириш, натижада банкни агросавдо ва чакана хизматлар йўналишида янада ривожланган тижорат молия муассасасига трансформация қилиш кўзда тутилган. 

Шунингдек, ўз фаолиятида сув ресурсларидан фойдаланувчи мижозларни қўллаб-қувватлаш, уларни молиялаштириш учун инвестицияларни кенг жалб қилиш орқали «Мовий» усулдаги молиявий банк бўлиш имкониятларини ўрганиш ҳам режалаштирилган.