Ўқитувчилар ва мураббийлар куни бу йил кўҳна ва ҳамиша навқирон Самарқанд шаҳрида нишонланди

Ўқитувчилар мураббийлар куни — умумхалқ байрами бу йил ўзгача шукуҳ билан нишонланмоқда. Бутун республикадан хизмат кўрсатган фидойи ўқитувчилар бу йил Самарқанд шаҳрига таклиф этилди.

Шанҳай ҳамкорлик ташкилоти саммити ўтган ИПАК ЙЎЛИ Самарқанд халқаро туристик марказидаги беш юлдузли меҳмонхоналарга жойлаштирилди.

Устоз ва мураббийлар туристик марказда амалга оширилган бунёдкорлик ишлари билан танишишди. Боқий шаҳар этношаҳарчасини ва эшкак эшиш канали бўйлаб саёҳат қилишди. Улар беқиёс таассуротларга эга бўлишди. Албатта, тантананинг бу тарзда ташкиллаштирилиши бежиз эмас.

Ўқитувчиларимиз юртимизда амалга оширилаётган ўзгаришлар, бунёдкорлик ишларини коллективига, маҳалласига, ҳаттоки ўзлари таълим бераётган фарзандларимизга ҳам сўзлаб беришади.

29 сентябр куни ШҲТнинг асосий тадбирлари ўтган Конгресс марказда байрамона тадбир ташкиллаштирилди. Қаҳрамон ўқитувчиларимиз хоразмлик Анор Маҳмудова ва қашқадарёлик Муҳаббат Шарапова бу йилги тантана ҳар йилгидан бошқача жозиба ва шукуҳ билан ўтаётганини таъкидлаб ўтишди.

Президент Шавкат Мирзиёевнинг Ўқитувчилар ва мураббийлар кунига бағишланган байрам табригини Президент матбуот котиби Шерзод Асадов ўқиб эшиттирди.

Шерзод Асадов, Ўзбекистон Республикаси президентининг матбуот котиби

Олий Мажлис Сенати раиси Танзила Норбоева ўқитувчиларни табриклаб, Президент фармонига кўра давлат мукофотлари билан тақдирланган ўқитувчи ва мураббийларга орден ва медалларни топширди.

Биз унвон ва орденлар билан тақдирланган айрим ўқитувчи ҳамда мураббийларнинг фикри билан қизиқдик. Андижон вилояти Марҳамат туманидаги 47-ихтисослаштирилган умумий ўрта таълим мактабининг кимё фани ўқитувчиси Абдуқодир Шамсиддинов муносиб равишда «Ўзбекистон Республикаси халқ ўқитувчиси» фахрий унвони билан тақдирланди. У айни пайтда тиббиёт ва таълим соҳасида фаолият кўрсатаётган 70 дан ортиқ олимларга устозлик қилган.

Ўрта Чирчиқ туманидаги 124-имконияти чекланган болалар учун мактаб-интернати тарбиячиси Баҳодир Эшонқулов ҳам ўзига берилган унвон бутун жамоа ишининг эътирофи деб ҳисоблашини айтиб ўтди

Қизириқ тумани 14-мактабнинг она тили ва адабиёт фани ўқитувчиси Абдураҳмон Менглиев ҳам ҳаяжонларини яшира олмади. Ўзининг камтарона меҳнатлари юксак мукофотга лойиқ кўрилганига ташаккур билдирди.

Президент фармони билан нафақат халқ таълими, шунингдек олий ва ўрта махсус, мактабгача таълим тизимида фаолият кўрсатаётган устоз ҳамда мураббийлар ҳам юксак мукофотлар билан тақдирланишди.

Кўкдала туманидаги коллежлардан бирида 20 йилдан буён ёш педагог ходимларни тайёрлаб келаётган Мўмин Азимов юксак эътироф унга қўшимча куч ва чоғлантириш бахшида этгани, шижоат билан ишлашда давом этажагини билдирди.

Қарши шаҳридаги 46-мактабгача таълим ташкилоти тарбиячиси Дилнавоз Қувватова эса янада юксак марраларни кўзлаган ҳолда, соҳага замонавий таълим услубларини жорий этишда давом этишини билдирди.