Боку «Европа учун муҳим стратегик энергия ҳамкорига айланади», деди президент Илҳом Алиев. Озарбойжон ресурсларига талаб «кескин ўсди», деди у.
Озарбойжон Европага газ экспортини сезиларли даражада оширишни режалаштирмоқда. Бу ҳақда республика президенти Илҳом Алиев 6 октябр, пайшанба куни Прагада Озарбойжон телеканалларига берган интервьюсида маълум қилди.
Унинг таъкидлашича, «дунёдаги ҳозирги геосиёсий вазият Озарбойжон ресурсларига талабни кескин оширган». «Европа иттифоқи билан имзоланган меморандумга асосланиб, биз яқин йилларда Европага газ экспортини камида икки баробарга оширишни режалаштирмоқдамиз. Яъни, ўтган йили 9 миллиард куб метр бўлган бўлса, 2027 йилда камида 18 миллиард куб метрни ташкил этади, балки ундан ҳам кўпроқ бўлиши мумкин», — дея Алиевнинг сўзларидан иқтибос келтирган АЗЕРТАДЖ давлат ахборот агентлиги.
Унинг сўзларига кўра, республика янги газ конларини ўзлаштиришга киришмоқда. Шу билан бирга, мавжуд конларда қазиб олиш кўпайтирилади. «Айни пайтда, Озарбойжонда қайта тикланадиган энергия манбаларидан фойдаланиш катта миқдорда табиий газ захираларини яратади», — деди Илҳом Алиев.
Боку газдан ташқари Европага нефть ва электр энергиясини экспорт қилишни давом эттиради, дея қўшимча қилди президент. «Озарбойжон Европа учун, нафақат Европа, балки бутун дунё учун жуда муҳим стратегик энергия ҳамкорига айланади», - деди Алиев.
2022 йил охиригача Озарбойжон Европа иттифоқига 2021 йилга нисбатан 30 фоизга кўпроқ табиий газ етказиб беришни режалаштирмоқда. 2022 йилда Европага етказиб беришнинг умумий ҳажми 12 миллиард куб метрни ташкил қилади, деб хабар қилди аввалроқ республика Энергетика вазирлиги.
Озарбойжон билан бир қаторда Европадаги энергетика инқирози фонида Европа иттифоқига газ етказиб беришни Исроил ҳам оширишни режалаштирмоқда. Исроил бош вазири Яир Лапиднинг сўзларига кўра, мамлакат Европа иттифоқига 2021 йилда Европа Россиядан оладиган газ миқдорининг тахминан 10 фоизини етказиб бера олади.
Ҳозирда Европа газ бозорида туб ўзгаришлар рўй бермоқда. Россиянинг Украинага бўлган тажовузкорлиги ҳамда Россия ва Ғарб давлатлари ўртасидаги санкциялар қарама-қаршилиги натижасида Европага кўк ёнилғи етказиб бериш сезиларли даражада камайди.
Европа иттифоқи давлатлари Европа, Осиё ва Америкадаги янги етказиб берувчиларга йўналтирилмоқда. Бундан ташқари, суюлтирилган газдан фойдаланишни кенгайтириш, фуқаролар ва саноат корхоналари томонидан газ сарфини тежаш, шунингдек, газ билан ишлайдиган электр станциялари фаолиятини тўхтатиш каби чоралар кўрилди.
